Monday, March 26, 2007

النهاردة فرحي يا جدعان


الظاهر البوست اللي فات زعل ناس كتير مني ، اللي قالك ايه ياعم السلبية دي كلها واللي قالك هتودينا في داهية ايه المظاهرة اللي انت عاملها دي واللي سأل ببراءة: هو كل من أيد الرئيس بقي منافق؟ وفي اللي خاف وقرر ميجيش يزورني تاني .. واللي قال حرام عليك متحرمناش من قلمك (ولو انه يعني قلم فرنساوي مضروب بيشحر وقرب يخلص ووالله ما اعزه عن أي حد!!) طيب اذا كنتم انتم يا اصحابي وحبايبي زعلتوا كده .. حبايبنا الحلوين في المجلس الموقر ممكن يعملوا ايه؟؟ عموما احتراما ليكم ونفاقا أقصد احتراما ليهم قررت أعتزل الكلام في السياسة واعيش حياتي بقي .. .. بلا دستور بلا اشتراكية بلا وجع قلب.
أول ما فتحت الدكانة دي والله كان غرضي أنشر عليها مؤلفاتي العظيمة من القصص الفاشلة، جايز الاقي حد يشجعني ولا يتبناني ويقولي
الله الله يا سي محمد )علي رأي صديقي العزيز عبد الغفار(، و لكوني مجرد أحمق آخر (غيرك) يحسب نفسه أهم كائن في الوجود، ونظرا لأن الغضب حماقة يا حورية، فطبيعي طالما اني أحمق فكان لازم "اتحمق" شوية.. لكن ما علينا والله غفور رحيم .. ننسي اللي فات واحنا ولاد النهاردة .. واللي فات مات وفي ديله سبع لفات، ونصلي ع النبي ونفتح الدكانة من تاني عشان منزعلش حد مننا، ومش بس نرش مية، لأ ونعمل ليلة كبيرة كمان ورقص ومغني للصبح .. ونعلق الكهارب ونعملكوا صوان كبير و"مرسح" كمان وأجيبلكوا سنية شخلع تحيي الليلة كمان، وعلي رأي يوسف بك وهبي .. ما الدنيا إلا مرسح كبير... هئ .. أنا جدع

من صغري والله وانا غاوي مرسح .. من أيام جورج أبيض ومرورا بالريحاني ويوسف وهبي ... اييييييييه مفيش أحلي من الفن الجميل بس للأسف الناس دول مع احترامي ليهم بس دمهم كان تقيل أوي .. متخشبين كده وعايشينلي في الدور والفن رسالة ومش عارف ايه وواخدنها جد أوي وفاهمين نفسهم بيخترعو الذرة ياخي .. .. المسرح القومي عدًى عليه مثلا ماري منيب وأمينة رزق وسميحة أيوب .. تلاقي الواحدة من دول ملهاش علاقة بالانوثة ولا هاين عليها تورينا حتة لحمة ويوم ما تدلع تقولك "أنتي جاية أشتغلي ايه؟" ... يا سم
النهاردة أحلي من امبارح، الفن النهاردة اتطور نفس التطور الطبيعي للحاجة الساقعة .. وسنية شخلع أخذت دور البطولة المطلقة .. وهو ده الكلام .. رقص وشخلعة والجمهور مبسوط وبيسقف وبيرقص .. والله الله يا ست .. أعد .. أحسنت .... صحيح الجمهور بتاع زمان معدش معاه فلوس عشان يدخل يتفرج بس سمعت ان فيه شلة منحرفة قدروا يلموا من بعض ويشتروا كم تذكرة ويدخلوا يتفرجوا علي المسرحية .. أخوانا دول معجبهمش العرض وقال ايه عايزين ينزلوا سنية شخلع من ع المرسح ... ياخي هأو .. كان غيركم اشطر .. من هنا ورايح التذكرة يا معفنين بخمسمية جنيه وابقوا قابلوني لو عرفتو تدخلوا المسارح المحترمة دي تاني .. جتكو البلا مليتوا البلد .. جمهور واطي صحيح ومبيطمرش فيه قاعدة اهزلكم في وسطي لما وسطي اتخلع .. وريتكم اللحمة البيضا اللي عمركم ما شوفتوها يا جعانين لا ايام ماري منيب ولا غيرها، ضحيت بشبابي عشان خاطركم ومرضيتش حتى اتجوز... ويكون في معلومكم سنية شخلع مش هتبطل رقص ولا فن والبت الحيلة بنتي هتكمل من بعدي ده بعد الشر يعني لو جرالي حاجه .. واللي مش عاجبه يبطل هو فرجة ... !!
محدش يسألني أيه العلاقة بين عنوان البوست وسنية شخلع
تقريبا كده والله أعلم أنا أتخبلت في نافوخي

29 comments:

شخبطة ملوكى said...

ما الدنيا الا مسرح كبير
يظل الناس يتذكرون الرواد المنشيين اللى بتقول عليهم اللى فضلوا ماسكين فى الخشبة و اتفصلهم ادوار لحد اخر حياتهم حتى وهما مابيقدروش يتحركوا
ونسيوا واقع اليم من اسفاف حول المسرح لكبريه كبير تدار فيها المؤامرات و يباع فيه كل غالى و ثمين من سمعة و مجد و كرامة
الدنيا مسرح كبير و خشبته انعكاس حقيقى للواقع
امتى بقى هايبقى عندنا رواد بجد...
الظاهر ان التهييس سمة اليوم الجميل للاستفساء
المشكله ان الواحد من دول بيمثل على الخشبه و متشبث بيها وهو مكحكح ومش قادر يصلب طوله و الناس عماله تحدفه بالبيص و الطماطم وهو بيقول الناس بتحبنى و المسرح يفضى عليه و يقول ان جمهوره عريض و مع ان جمهوره من البلطجية و المؤجرين
تمثيليه كبيرة يا عزيزى واحنا مكتوب علينا نشوف المسرحية كل يوم بتتعاد على كل القنوات

Anonymous said...

قاسم افندى :

انا كان عندى سؤال عن اذا كان سنية شخلع عندها ولاد، بس الحمد لله لقيت الاجابة ،؟؟؟

اتمنى ان يكون فهمى للبوست صحيحا و ان يكون هذا ما قصدته لاننى فعلا اتخضضيت من الكلام، ولان قلمك الفرنساوى ده هو اللى كتب لليونسكو و اللى كان السبب فى الحملة اللى الحمد لله تم الاستجابة لها ، علشان كدة كنا عايزينك ترجع للكتابة و لقلمك ، القلم اصبح املنا الوحيد ، و اكيد اى رأى بيتعرض للقبول و الرفض ، و لكن عن نفسى انا اعلم ان رغبتك فى غلق المدونة لم تكن سلبية منك و لكن نتيجة حالة الاحباط اللى اصابتنا كلنا ...

اما بالنسبة لسنية شخلع فاعتقد انه أجرت بودى جاردز كتييير نشرتهم فى كل حتة و اول ما رقاصة تيجى ، او حد يسقفلها يشوفوا شغلها ،
افتكرت قوى نبيلة عبيد فى فيلم الراقصة و السياسى لمل قالت لصلاح قابيل مفيش فرق بيننا ، انت بتلاعب لسانك انا بهز وسطى على حسب ذاكرتى يعنى ...

قاسم أفندي said...

طارق
اذا لم تستطع المقاومة فعليك أن تستمع
متخدهاش جد كده واستمتع بالعرض .. ومتنساش النقطة بتاعت الضاد
********
باكي
فهمتي ايه بس؟ شكلك هتودينا في داهية
انا قفلت كده كام يوم بس اشوف غلاوتي عندكم دستور ايه وكلام فاضي ايه انا حاليا باستمتع بالعرض بتاع سنية شخلع
شكرا لمتابعتك وذوقك
تحياتي

Rania Lelah said...

تصدق بايه يا ايمن افندى
ان عندك حق بس طبعا كان همك الدستور زينا بالظبط بس انت بتدكن :))
ربنا يعينك
شكلنا كلنا هييسنا
لا حول و لا قوة الا بالله

أحمد سلامــة said...

كوووووووووووووووووووله بايظ
سينما ، مسرح ، أغاني ، مواصلات ، أكل ، شرب ، هوا ، سكن ، سفر ، قهر غلب فقر مرض
أوووووووووووووووووووووووووف
الله يحرقهم

قاسم أفندي said...

رانيا
يا رانيا
ياااااااااااا رانيا
الموضوع ملوش علاقة لا بدستور ولا غيره متدوناش في داهية
كل ما فيها اني ابتديت اقدر الفن
أرصلك حجرين؟
***********
أحمد سلامة
عجبني أوي موضوع كنت قريته عند جعان واللي عجبني أكتر كان عنوانه
أحترس الوطن يرجع إلي الخلف
شرفتني يا باشا وأوعي ضهرك

يعقــــوب .... said...

يا قاسم باشا انت فاكر ان انت هتتفرج كده كمان بالساهل ,ده حتى الهيكون نفسه يتفرج لازم يتسحل الأول عقبال لما يوصل لمكان يعرف يتفرج و يستمتع منه...بس أنا قلت لأ باه أنا مش بحب اتفرج على سنية و انا ماشي من المسرح ده و اشوف مسرح غيره حتى لو كان البطل مش اد كده بس في نظام في المسرح...لحد ما ربنا يفرجها و يجددوا المسرح أصل الكراسي كلها مخلعة...و مش مشكلة يا سيدي لو التذكرة بخمسمية جنيه بس هى تسلك

محمد عبد الغفار said...

ولا خبل ولا شئ

انت عندك اتضراب فى اللاوعى المنعكس على الواقع نتيجه الإصابه بنوبه دستوريه

قاسم أفندي said...

يعقوب
منور يا مان
تيك ات ايزي وبيييس
اعمل زيي انا باتفرج اهو ومية مية ومش بس ببلاش .. لا ادوني وجبة وفلوس كمان ديتها بس قول نعم واطلع زغرط في الشارع
خليك بحبوووح
******
عبد الغفار
معلش صحيح الواحد جاله اصطدام في النفسية بس الحمد لله ان بؤرة اللاشعور لسه شغالة
ياعم خلينا في الهشك بشك اجدع

Rania Lelah said...

؟حجرين ايه بس
لالا خليك فى المهم كوكايين هيروين
يمكن الواحد ينسى
يلا بقى هى طلبت معايا
ان مروحناش فى داهية علشان الدستور نروح فى داهية من نوع تانى
حلاوتك يا معلم
:))))

بنوتة من وسط البلد said...

ايه ده يا باشا ده
ده الموضوع لعلع معاك على الاخر
وايه الاخوة بيدخلوا المواضيع في بعض ليه وعايزين يودوك فى داهية

هو فى حد منافس لسنية شخلع مسلطهم عليك ولا ايه .. ؟

اكيد جى جى جنح

وسلملي على الفن والفنانين العرب
تراباتاتاتــــــي

زحل الفلكي said...

قاسم بيه افندي

ازيك يا استاذنا
ايوه كده ارجع اكتب ولعلع

اسف اني كنت من الناس اللي ظنوا فيك السلبيه من البوست اللي فات

وطبعاً هناك علاقة وطيده بين سنيه شخلع والعنوان

مش دلوقتي بقا كل فرح بيوزعوا فيه رقاصات مع المشاريب

وسلملي على العنب

35L said...

يا عم فل.....أنت راجل تمام

AHMED SAMIR said...

طبعا انا مافهمتش اي حاجة بصراحة من اللي انت كاتبها.
يمكن علشان الساعة دلوقتي 1 صباحا وعايز انام او لأن انت كاتب كلام غريب او لأن دماغي صدت وانت كاتب كلام عميق وثلاثي الابعاد وانا مخي ثنائي الابعاد بس.
عموما ماتحرمنيش من انك تطل عليا في المدونة بتاعتي وتقولي رايك في اللي بكتبه لاني بجد بحب رايك
تحياتي

يعقــــوب .... said...

يا باشا و مين قلك ان انا مش واخدها إبزييي ده انا فاككها من زمان و لا حتى فكرت فيها و لا حتي لحد دلوقت قريت ام عدلات ده اصدي التعديلات..بس اصلي عارف ديتها و اخرها....و احلى تحية ليك

قاسم أفندي said...

رانيا
والله شكلك اصلا بق وبتدوخي من ريحة السجاير
وبصراحة انا شاكك فعلا ان جيجي العالمة هي اللي زقاكي علي زي ما دينا بتقول
صبح صبح يا عم الحاج
***********
بنوتة
ينصرك علي مين يعاديكي يا رب موضوع جيجي جنح ده انا كنت مستبعده بس لقيت فعلا معاكي حق .. من هنا ورايح النفر منينا لازمن ولايابد يحط عينه وسط راسه .. ولو انه كده هيتحول
تعا اشب شوية شاي
************
زحل
خلاص ياباشا احنا ولاد النهارده واللي فات مات وفي ديله سبع لفات قلنا ولا اسف ولا بطيخ يا عم متستاهلش
كلامك عن علاقة العنوان بسنية شخلع هو اللي ممكن يزعلني منك ... لالالالا ابسلوتلي
************
35l
منور وشكرا ليك
بس قولي اشمعني 351?
************
سمير
ياباشا الموضوع اصلا أحادي الابعاد
نام انت بس دلوقتي والصبح عدي هنا مع كباية الشاي ونشرة الاخبار واغنية العنب العنب هتلاقي نفسك اكيد بنسبة خمسة وسبعين وستة من عشرة في المية قمت اتحزمت وقعدت ترقص زيي
صباحووووو
**************
يعقوب
صباحو قشطة وحليب
اللي خلى شيخ الازهر نفسه ميعرفش التعديلات
خليك مع الشيعب
يحي الشيعب
يسعدلي صباحك

smraa alnil said...

هيييييييييييييه
اشطة عليك يا ابو ايمن يا فاهم
هو دة الكلام
وحبة فوق وحبة تحت
وسمعني اجدعها سلام كلابي

هههههههه
هم ضحك وهم يا جمل
الظاهر والله اعلم هي شوطة وتجتاح مواطني المدونات الا وهي مفيش احسن من اللمة الحلوة
وساعه الحظ
مالها
ماشيه بعقارب

هههههه
شكلي هيست
بس يلا كله بيطلع في الدستور قصدي في الغسيل

Memo said...

انا كدا ابتديت اكلك على كواك العكليه لا لا لا يا ايمن استهدي بالله كدا ئوم اغسل وشك محدش واخد منها حاجه يا راجل
انت لسه شفت حاجه
دالتقيل جي ورااااااا

كلبوزة لكن سمباتيك said...

ده رد فعل متوقع للاحباط اللي اتلطشنا بيه كلنا
شاهدة يا حكومة
قاسم كان زي الفل قبل التعديلات و اهو الراجل فيوزين في نافوخه لسعوا
حتروحي فين من ربنا يا حكومة

معلش يا قاسم كلها يومين و ترجع الطاسة مكانها

و اللي اخد منك الفيل قادر يرجعهولك

و تحياتي

قاسم أفندي said...

انجي
ايه يا بونيتي؟
بتتسطلي ع السيرة ولا ايه؟
هم يضحك وهم يا جمل وهمبورجر كمان
فعلا والله مفيش احلي من الصحبة الحلوة بس يا خوفي نتجمع ع البورش
هههههههههههه
أرصلك الحجرين اللي أختك رانيا سابتهوملي وقعدت تشم كولة فوق؟
************
أوختشي العزيزة ميمو
انا بخير وكوايا العكلية تمام وأرجو التنازل عن كضية الحجر علي المدونة وباهدي سلامي لامي واخواتي بكفر البلح اطمئنوا انا بخير وأول ما احوش تمن العجل هاجيلكم علي طول
زافروووووووووووت

أقولك من الاخر كده
تعرفليش داكطور شاطر؟
بيب بيب أعوووعااا
********
سمباتشييك
المشكلة يا اوختشي انه مش أي احباط لا لالالا ده احباط تحت الباط
اما بالنوسبة للطاسة فاعتقد ممكن دلوقتي نجيب معلقة سمن تشبيعي وعدد 2 كوب لبن وبيضتين ونقلبه في الطاسة كويس لمده ساعة ونص وأول ما الوش يحمر ندخله الغسالة

hamasat said...

عزيزي قاسم
احزنني جدا المد اللي وصلت له
اسفه فات علي البوست الماضي بدون ان استطيع المشاركه وللاسف لحقت البوست اللي شعرت منه بمدي حالة الاحباط التي انتابتك ولا تحزن ولا تحبط دوام الحال من المحال والتغيير قادم لا محال سواء عاجلا او آجلا المهم الا نفقد روحنا القتاليه المصره علي التغيير للافضل مش مهم نغير المهم نحاول دون ياس علينا السعي وليس علينا ادراك النجاح
تحياتي

SomeOne said...

ههههههههههههههه


جامدة قوي صورة سنية شخلع دي

basma saghir said...

ايه يا اخ قاسم والله ووصلت لسنية شخلع وتوابعها...انت نتيجة الاستفتاء جابتلك ارتيكاريا ولا ايه؟
فوق كدة وصحصح...وبعدين ازاي تقول على ماري منيب سم؟..دي عسل والله وبعدين عايزها توريك انهي نوع من انواع اللحمة..ياترى ضاني ولا بتلو؟؟
انت هيست ياقاسم ولا ايه؟؟
والله كلنا هيسنا مش انت لوحدك
ابقى احكيلي بقى على نهايو المسرحة بتاعة سنية بقى

-_- said...

قاسم بيه

حبيبي

ركز معايا

العنوان و الموضوع و الصورة

كل واحد فيهم في ناحية

انا اتحولت

!!!

الا تكون دي صورة سنية شخلع ؟؟

قاسم أفندي said...

همسات
اولا حمد لله علي السلامة، طولتي الغيبة وانشالله يكون السبب خير
ثانيا الموضوع تعدي مرحلة الاحباط والله وللأسف غالبية الشعب لا يعلم شيئا عن هذه "التعديلات" ولا الغرض منها، اللي حصل ده لا يمكن أن يطلق عليه لفظ أقل من مسخرة.. للأسف العرض هابط جدا جدا .. بس برضه اللي انا كتبته ملوش علاقة بالموضوع ده خالص
:)
مجرد هلوثة يعني
*********
شادي
أزيك
والله الصورة الحقيقة للست سنية أكثر مسخرة .. بس مقدرتش أحطها انت عارف دي أعراض ناس
********
بيسو
برضه هتقولي لي دستور واستفتاء
يا جماعة انني ومن موقعي هذا أعلن لكم جميعا ان سنية شخلع لا تمت للدستور بصلة ولا توم
علي فكرة انا كمان "كنت" بحب ماري منيب .. بس دلوقتي مينفعش كلنا لازم نحب سنية شخلع
والعرض مستمر وربنا يدينا الصحة وطولة العمر انا وانتي والسامعين لحد ما نشوف الستارة نزلت
قولي آمين
منوراني
**************
شارم
سيبك انت الوحيد اللي فاهمني من الناس دي
فعلا الموضوع لا علاقة له بالصورة والعنوان لا علاقة له بالاتنين
وقصة هذا الفيلم من وحي الخيال ولو حدث تشابه بينه وبين الواقع فهذا من قبيل الصدفة

eman said...

لو على الناس فكلنا لسعنا من زمان نحن فى زمن التهييس العالمى اللى فيه سنيه شخلع من اكثر الناس احتراما لانها السيده المصونه اللى صاينه تهييسنا على الاخر وماحدش واخد منها حاجه
يظهر ان انا كمان خرفت وبكتب كلام مالهوش علاقه ببعضه معلش طالب ثانويه عامه

Anonymous said...

:D

عايز اضحك وبس والله


مش ع الكلام ، ع الصورة


جبتها منين دي يا حاج

شــــمـس الديـن said...

الصورة فعلا مسخرة

هههههههههههههههههههههههه

تقريبا هي تركيب

بس انا فاكرة اني حطيت تعليق علي التدوينة دي ... و مش عارفة راح فين !!!!!!!!!!!1
ولا يمكن انا كمان اللا وعي عندي ضرب

ربنا يستر
اقول ايه بس معاك حق في كل كلمة

قاسم أفندي said...

ايمان
التهييس ظاهرة صحية يا عزيزتي فهي تعمل بمثابة التنفيس الطبيعي اللي من غيره ممكن ناخد هواء زيادة ونطق نموت
صباحك سعيد
*******
عبد الرحمن
الصورة ياعم موجودة في كل حتة
ايه يا عم مبتشوفش جرايد ولا ايه؟
********
شمس الدين
والله يا افندم ما شلت حاجه
غالبا هو فعلا اللاوعي اللي قافش في بؤرة اللاشعور
فعلا مشكلة اللاشعور مشكلة كبيرة لكن مع صانسيلك لمنع تساقط الشعر هينتعش الشعور ويبقي زي الحرير وهتقضي تماما علي اللاشعور
جربيه بنفسك
:)