Wednesday, March 07, 2007

البيت بيتك

اتأخر ولا يهمك
عندنا لما تتأخر عن معادك فأنت بالتأكيد واحد مهم جدا
عند التانيين لما تتأخر عن معادك فأنت شخص مهمل ومستهتر

أكسر أجدعها أشارة
عندنا لما تكسر اشارة المرور فأنت واحد "فهلوي" و "جامد"ء
عند التانيين لما تكسر اشارة فأنت شخص مجرم

طرطر مطرح ما انت عايز
عندنا لما تبول تحت الكوبري فأنت "بتعمل زي الناس"ء
عند التانيين لما تبول تحت الكوبري فأنت "بتعمل زي الحيوانات

أسرق براحتك
عندنا لما رصيدك في البنك يكون من سبعة أرقام قبل قرار المدعي الاشتراكي ما يطلع بنكون طلعناك انت وفلوسك برة
عند التانيين لما حسابك بيوصل لكده أكيد هتتحبس

كل سنة وأنت طيب
عندنا بنقولك كل سنة وأنت طيب كل يوم مئة مرة (حاجه لله أو يعوض عليك ربنا)ء
عند التانيين محدش بيقولك "كل سنة وانت طيب" الا أول يناير
.
دعارة بعقد جواز
وعندنا كمان نديك بنت بكر شريفة تقعد معاك زي ما انت عايز تنام معاك وتطبخلك وتنضفلك بعدين ترجعها لما تزهق نها بخمستلاف جنيه بس
التانيين بيدلوك مومس بنفس المبلغ ده ولمدة ليلة واحدة بس ولا تقدر تطلب منها تمسح ولا تطبخ ولا حتي تنضف السرير اللي نامت معاك عليه

عندنا لما تسأل واحد علي عنوان عمره ما هيقولك ما أعرفش
وعندنا لما تعدي الشارع العربيات هي اللي تخلي بالها منك مش العكس
وعندنا كمان لما كلب سعادتك ياكل عيل صغير، العيل بيتحول لمجلس تأديب عشان اهله معرفوش يربوه
وعندنا كمان لما تمًوت بعربيتك عشر انفار هتلاقي اللي بيقولك فداك وبيروحك لأمك ويقولك فداك
وعندنا كمان لو ظابط الشرطة ولا حرس الاوتيل اللي انت نازل فيه ضايقك تقدر تضربه وتحط في بطنك بطيخة صيفي

في مصر البيت بيتك

14 comments:

hamasat said...

انا اول تعليق هيييههههه
عارف لسه كنت داخله مدونتك اسيلك نوت ان غيبتك طولت من باب الاطمئنان علي الزعيم خفت لا تكون اتعلقت!!!لكن الحمد لله انت بخير ويؤسفني ان ما كتبت هو واقع بلدنا الحبيب ياريت نلاقي طريقه نغيره بيها
تحياتي

شخبطة ملوكى said...

قاسم باشا افندى
ههههههههههههه حلوة باشا افندى دى عجبتنى قوى
المهم يا سيدى مع الاسف حال بلدنا بقى مايسرش لدرجة انى بفكر اننا نلغى السياحة من بابه او اننا نراقب اى سائح غير مصرى من يوم ما ييجى لحد ما يغور
عجبنى الحتة اللى ف وسط السفرة دى بتاعت كل سنة وانت طيب بجد بتغيظنى جدا
ولى ملحوظتان ان مع الاسف السرقة من البنوك مننا فينا مش من الاجانب لان حالتهم نادرة قوى و التانية لامؤاخذه التبول تحت الكوبرى ده عادة مصرية جدا وحتى لو اغريت بيها اى جنسية هايستحى لامؤاخذه يعملها حتى لو هايموت
جميل الموضوع و الفكرة يا ايمن

قاسم أفندي said...

همسات
:)
الحقيقة التعليق بتاعك وصل وانا باحاول لسه أوضب الفورمات بتاع البوست
:))
متشكر جدا علي سؤالك ومتخفيش نموت نموت ويحيا سعد
مش عارف هنغير أيه ولا أيه بس؟؟
أقترحي طيب
_____________
طارق باشا شخبطة
والله انا اخترت أفندي دي لأنها هي الوحيدة اللي ذات معني في جو أصبح السباك باشا والعربجي بيك
جايز يكون معاك حق بس اهو عموما اوبشن يعني للي عايز يعمل زي الناس او يسرق ويجري وكله عشان خاطر عيون السياحة

الدبور said...

يخرب عقلك يا قاسم باشا مش تنفع تكون افندي انت لازم تكون باشا
كلهم جامدين بس اكتر واحدم بتاعت الطرطرة دي في الجون

Abd El Rahman said...

لأ يا زعيم .. معجبتنيش بجد

انت كاتبها وخلاص ؟ يعني مكنش لك نفس تكتب؟ لأ .. انت بتكتب احسن من كده

ولا يمكن عشان انا لسه منمتش من امبارح؟ ولا يمكن لأني من مناصري الطرطرة تحت الكباري عشان شعب مصر يروي الأرض العطشانه !

لأ برضه ، تتكتب وتتخدم احسن من كده :) عديها بقى

Memo said...

انا مش هقدر اسيب اسمي من الكسوف
عشان كدا هلبس طقيت الخفا و اعلق
هيا دي مصررررررر يا ايمن
تاك ايت اور ليف ايت
البيت بيتك
و احب اضيف ان عندنا الاجنبي يدرب المصري بالجزمه ويقول اي و لا حد يقولو تلت التلاته كام
و البيت بيت ابونا و الغرب بيمرمطوننا



بحبها بعنف و رئه و على استحياء

و اكرها و العن ابوها بعشق زي الداء


و ادعي عليها و اكره اللي يقول امين



تحياتشيييييييي

شادي فايد said...

ايه ده

والله انا كنت حاطط كومنت هنا

راح فين
---------------
يلا حصل خير
نحطة تاني
----------
هم يفطس من الضحك الصراحة

يا ترى المشاكل دي سببها الحكام؟؟؟

بنوتة من وسط البلد said...


انا جييييت
اذا كان على البوست .. انا مع جادو كان ممكن يتسبك احلى من كده لو اتساب على النار شوية.. بس واضح انك كنت مستعجل يا باشا

بس البوست بتاعك عملى زلزال نفسى فى نفس الوقت .. ده احنا رسمنا صورة وقلنا هى دى مصر يا اخوانا لو حالنا اتصلح

الاقيك جايب فرشة مهببة لطخت الصورة كده .. بس الصراحة عندك حق

امبارح بس سمعت فى محاضرة

عارف اسباب الحصول المصرى للصفر الذهبى بتاع المدعوء مونديال 2010 كان ايه ؟؟

كان السبب الرئيسي فى الجمهور المصرى وهيتعامل ازاى مع سيدات ونساء العالم المشجعات لما يزوروا مصر

شوف الريالة وقلة الأدب الى بتحصل فى الشارع مع السيدات الاجانب الا لابسين شورت وبوديهات ستوماك .. واللحم البمبة لما يظهر يا رجالة
ده اذا كان بيحصل بلاوي فى بنات وسيدات بلدنا .. مش هيحصل فى الاجانب

ده غير انى فتكرت نكتة عن الى اسمه ايه ده الى بيتعمل تحت الكوبرى .. بس ابقى اقولهالك بعدين :)))

طولت معلش .. بس بلاش تغيب علينا ده تانى يااااااافندى

قاسم أفندي said...

الدبور
أي خدمة يا دوك ..أحنا بلدات الحريات يا باشا
______________
عبد الرحمن
أنا كمان مش عاجباني بس هاسيبها عظة عشان محدش يعمل كده تاني
______________
ميمو
والله كلنا بنحبها حتي اللي بيعمل بي بي تحت الكوبري برضه بيحبها واللي بيشحت بكل سنة وانت طيب برضه بيحبها واللي مواعيده بايظة برضه بيحبها واللي بيسرقها برضه واللي سامح لحسالة البشر يمرمطو فينا برضه بيحب مصر
أيه بقي اللي خارب أم البلد طالما كل دول بيحبوا بيحبوها؟
ملاقيكش عندك حتة فطير مشلتت وشوية جبنة قديمة؟
_____________
شادي
والله ماخدت أي كومنت يا باشا .. حتي فتشني
حكام مين ياعم بس هو حاكم واحد وبعدين الراجل هيعمل ايه ولا ايه
شوف العظمة اللي احنا فيها دي شاركت فيها كل قوي الشعب العامل في مصنعه والمدرس في مدرسته والخ الخ الخخخخخخخخخ
عجبتني حكاية العامل في مصنعه دي أوي

Pakinam Nasser said...

للاسف هو ده الواقع و ده حال بلدا ، يمكن ز ما بنوتة قالت احنا كنا رسمنا صورة حلوة ، بس للاسف الصورة دى موجودة برضه ، بس يا ترى فعلا دى غلطة الناس بس و لا هما بقوا كده من اللى شافوه

jou jou said...

حلوه يا ايمن بجد كالعاده ....و بصراحه انا عمري ما لقيت حاجة انت كتبها حتى نص نص .. يمكن تحيز ...يمكن علشان مصرية هيههيهي بس تعليقى ان الكلام ده واع و ما خفيه كان اعظم
و " تبقى انت اكيد اكيد في مصر "

تحياتي من البيت بيتك

hamasat said...

اعتقد ان اول خطوات التغيير ان نبدا بالاسرة نبحث في اسباب الانفلات والتسيب والاستهانه بكل فواعد التربية التي نشا عليها الاجيال السابقه
اين دور الاسرة في غرس الوعي الديني والعلمي والفهم الصحيح للحياة وكيفية التعامل معها
اين دور الاسرة في تعليم ابنائها كيفية تحديد الاهداف وكيفية ترتيبها حسب الاهمية
اعتقد اننا في حاجة لثورة شاملة علي كل اوضاعنا

قاسم أفندي said...

بنوتة
اسباب صفر المونديال كتير اوي اعرف منها المواصلات والنظافة .. حاجه عرة مش كده؟
أيه هي النكتة بقي؟
يارب تطولي كل مرة .. حقيقي بتوريني
____________
باكي
معلش بقي سديت نفسك بس للأسف ده جزء كبير من الواقع
والسبب أكيد مش الحكومة وبس .. المنظومة كلها غلط
تحياتي وأشكرك
_____________
جوجو
ربنا يخليكي ليا يا أحلي جوجو دايما ناصراني ورافعة من روحي المعدنية كده
نورتي مصر
____________
همسات
والله كلماتك صح مية في المية بس هنعمل أيه أذا كان كتير من الاهالي نفسهم عايزين يتربوا؟
الموضوع يطول شرحه ومتهيالي عايزله بوست لوحده

mafyozo said...

كل كلامك صح الصح