Monday, March 19, 2007

ننتقل إلي إذاعة خارجية

في نظرتنا لواقع الصراع العربي الاسرائيلي نجد أن الأمر لا يختلف كثيرا عن مبارة كرة قدم يصارع فيها الفريقين لكسب المبارة مع بعض الفوارق البسيطة.
ولنذهب بخيالنا بعيدا للإنتقال إلي إذاعة خارجية من استاد العربي الدولي مع الكابتن المرحوم محمد لطيف والبث المباشر لأحداث المبارة الدولية المرتقبة والهامة بين الفريق العربي والفريق الاسرائيلي فإلي هناك ...

***
فاصل إعلاني
****
أعشاب العنتيل
أعشاب تخلي الفتلة فيييييل
والضلمة قنديل
والفيل في المنديل
ومعادش في حاجه مستحيل
اشتري الاعشاب أوام ... ومتضحكش عليك المدام
بضمان الحاج مرعي أبو أشرف
***
سيداتي آنساتي سادتي .. كابتن لطيف يحيكم وينقل لكم أحداث المبارة المهمة والنهائية واللي الكل منتظرها من أكتر من ألف سنة واللي هيتحدد علي ضوئها أصحاب المركز الأول والأخير، طبعا كلنا عارفين نظام البطولة، بس هنعيدها بسرعة عشان اللي لسه جاي من برة ومكانش معانا. الماتش بتاع النهاردة مش من تسعين دقيقة، لا الماتش مفتوح لحد ما ربنا يأذن، علي ما تفرج يعني وبنظام خروج المغلوب، يعني اللي هيتغلب هيروح اذا كان لسه له بيت يروح فيه، واذا مكنلوش يبقي هيصيف.
الفرقتين نازلين أرض الملعب وشايف معام نازل طاقم التحكيم الدولي تحت اللي نازل الملعب "أنجاجيه" مع الفريق الاسرائيلي.
والجو جميل والدنيا ربيع والأمن حاجه تشرح ونظافة ونظام زي الفل وربنا يطولنا في عمرك يا ريس!
اذا كنت قاعد في المقصورة الرئيسية فهيبقي علي يمينك اسرائيل بلباسها الديني الأسود الواضح بالقبعة اليهودية والشعر المضفر، وعلي شمالك ويمينك وفي كل حتة هتلاقي الوطن العربي بدون لباس (أو بالأحري بدون ملامح، فهو مازال يتقاتل بين الدين والهوية والقومية والديموقراطية والليبرالية والمهلبية).
بيتكون فريق اسرائيل بالاحتياطي والجمهور اول عن اخر من حوالي 4 مليون. والفريق العربي (أو الفرقاء العرب) من بتاع 200 مليون يعني نسبة 50:1، واللي جاي من برة جديد ومش فاهم هيقولك الله يكون في عون اسرائيل .. أكيد هتشيل دستة النهاردة ...
طبعا كلنا عارفين أن فرقة اسرائيل عاملة معسكر مغلق من ايام الهكسوس، ومجهزين خطة مظبوطة من ايام برتكولات حكماء صهيون، ومظبطين الحكام ومعشينهم بدري من بونا أبتي وساقينهم فخفاخينا من فرغلي.
الفريق العربي مقضاش فترة استعداد خالص ولا عمل معسكر من أصله لأنه اتفاجأ بمعاد الماتش. وكان فاكر ان اللجنة المنظمة برئاسة
السيد بلفورد بتهزر.. لما حددت أصلا معاد الماتش قبل تسعة وعشرين سنة وبالتحديد سنة 1917.
نظبط ساعاتنا كلنا الساعة دلوقتي قدامي علي شاشة الاستاد بتشير لـ 1948 .. اسرائيل سنترت، الظاهر الحكم عمل القرعة من غير ماحد ياخد باله، المهم الماتش بادي سخن أوي يا جماعة والكورة مع اسرائيل، واللعيبة العرب واقفين لسه في مكانهم مستنين صفارة البداية بتاعت الحكم، بس الحكم مصفرش وبيقول ألعب، اللعيبة العرب أتلموا ع الحكم بيحتجوا واسرائيل مكملة الماتش عادي وبتلعب والاستاد كله صفافير والحكم لسه بيشاور "العب" والكورة مع بن جوريون .. وبيشوووووط .. جوووووووون .. هنشوف الحكم بيقول أيه ... انا مش شايف حاجه من الناس اللي قدامي والفريق العربي وجمهوره كله ملموين علي الحكم اللي مصفر بيبسوا ايديه عشان ميحسبش الجون وكام طوبة هنا وهناك بتتحدف .. الماتش وقف تقريبا، ياترى مصفر جون ولا أوفسايد ولا فاول ولا ايه .. هنشوف ... اه مصفر جون يبقي كده واحد صفر لصالح اسرائيل في الدقيقة الاولى من المبارة. نتمني الجون اللي اتخطف في الدقيقة الاولانية ده ميأثرش علي همة لاعيبتنا ويكملوا الماتش بروح عالية .. هنشوف الإعادة في الاستديو التحليلي بين الشوطين
هجمات عنترية من فريق العرب بدون خطورة حقيقية علي المرمي وفرص ضايعة بالزوفة للفريق العربي و242 انذار لحد دلوقتي علي اسرائيل والفريق العربي معرفش يستغل ولا انذار من دول لحد دلوقتي بس ايييه الجمهور مولع نااار وعمال يشتم شتيمة أبيحة أوووي.
الدقيقة 1956 واسرائيل بتعمل تبديل .. هنشوف مين اللي نازل ... اوباااااا .. دي نازلة بالمحترفين اللي جابتهم مخصوص للماتش من انجلترا وفرنسا .. لعيبة اسرائيل كلهم والمحترفين بتوعهم كلهم في منطقة التمانتشر بتاعت العرب .. شوطة جامدة .. وصدة أحلي بترجع لهم تاني وبيجرب حظه وبيشوط تاني وبتتصد .. حارس المرمي وقع وشايف وقف مكانه خط الباكات ... وبترجع الكرة تاني مع اسرائيل جوه السيكس ياردز دلوقتي والفرقتين في حلق المرمي ودربكة والحكم بيصفر ... هنشوف حاسب ايه ... بتوع الاسعاف دخلوا وشايفهم شايلين حارس المرمي وخط الباكات كله عشان يتعالجوا برة .. والحكم حسب ايه؟؟ محسبش حاجه .. وهيعمل اسقاط تقريبا.. الحمد لله ربنا ستر في الهجمة اللي فاتت دي، صحيح راح فيها حارس المرمي وخط الضهر كله بس الحمد لله مجاش الجون ، وهنستأنف المبارة . وعلي ساعتي انا تقريبا الشوط الاول خلص والحكم بيبص في ساعته والفرقتين تقريبا اقتنعوا بالنتيجة ... وسامع الجمهور كله بيصفر والحكم مطنش وبيقول كمل لعب .. وشايف كابتن الفريق العربي طالع لوحده في هجمة عنترية .. وبيشوح بأيديه وعمال يشتم في لعيبة اسرائيل وبيجري لقدام داخل مربع العمليات لفريق الخصم وبقية الفريق العربي كله بيجري وراه من بعيد .. بس أيه ده؟ ده بيجري من غير كورة !! .. الله .. هي الكورة فيييييييييين؟؟ الكورة مع اسرائيل في حالة انفراد مع التلات خشبات بتوعنا وبتوع سوريا والاردن ... وايه اللي انا شايفه ده ... بيشووووووووط صارووووووخ بيقطع الشبكة ... والحكم بيصفر ... حاسب ايه يا تري؟؟ شايف اللعيبة بتوعنا بيعترضوا علي أنه أوفسايد ... هنشوف الحكم حاسب ايه ... ده مشاور بأيديه زي حكام الباسكت يعني ثلاثية .. والفريق العربي معترض والجمهور بيصفر وبيحمر وبيخضر ... والحكم بيقول الجون ده بتلاته وقرار الحكم نهائي .. يبقي الدقيقة 1967 و أربعة : صفر .. الكورة مع الفريق العربي وبيسنتر دلوقتي زي منا شايف من علي خط السكس ياردز بتاعه وباصاته تقريبا كلها مقطوعة وبيلعب ع المرتدة وابتدأ يسيطر ع الماتش لأول مرة في المبارة وهجمة حلوة وضغط عربي جامد وشايف الحكم ابتدا يلعب هو كمان مع الفريق الاسرائيلي .. وهوبااااااا شوطة قوية في حلق المقصات لا تصد ولا ترد وجوووووووووووووووووون جووون جوووون في الدقيقة 1973 من هجمة مباغتة يحرز الفريق العربي اول اهدافه ...
اعزائي المشاهدين في كل مكان مشاهدي راديو وتلفزيون العرب نعتذر عن قطع صوت الكابتن لطيف الله يرحمه ونواصل معاكم المبارة اللي بقت مملة أوي وبايخة وتقرف من خلال شاشاتنا المتشفرة واللي يعرف يفك الشفرة يبقي يجي يقابلنا
****
فاصل إعلاني تاني بس حزين شوية
****
النَّملَةُ قالتْ للفيلْ:
قُمْ دَلّكْني
ومُقابل ذلكَ.. ضَحِّكني!
وإذا لم أضحكْ عوِّضني
بالتّقبيل وبالتمويلْ
وإذا لم أقنَعْ.. قدّمْ لي
كُلّ صباح ألفَ قتيلْ!
ضَحك الفيلُ
فشاطتْ غضباً:
تسخر مني يا برميل ؟
ما المُضحك فيما قد قيلْ؟!
غيري أصغرُ..
لكنْ طلبتْ أكثر مني
غَيركَ أكبرُ..
لكنْ لبّى وَهْوَ ذليلْ
أيّ دليلْ؟
أكبَرُ منكَ بلادُ العرْبِ،
وأصغرُ منِّي إسرائيل
"أحمد مطر"

9 comments:

Abd El Rahman said...

زي ما قلت لك .. الكتابة اللي كلها اسقاطات مقبولة جدا لو اتكتبت صح وانت كاتبها صح ، فكرة الماتش عملها عادل الفار تقريبا بنفس الاسلوب بس بهبل ، انت كاتبها كويس ومش عارف مش عجباك ليه !؟

على فكرة .. يوم وعد بلفورد يوافق عيد ميلادي مما يؤكد نظريتي اني واد وشه حلو ع العالم كله

2/1/1917

والنهاردة بالصدفة ذكرى وفاته .. بتهيألي السفير الاسرائيلي معندوش مانع يحضر ربعين القران في عمر مكرم لو سيادة الريس كرم بلفورد واولاده

Abd El Rahman said...

2/11/1917


ده تصحيح لتاريخ مهم *

:D

يعقــــوب .... said...

الفكرة حلوة ة الكلام مرتي و ممتاز

بنوتة من وسط البلد said...

الحقيقة انا لا بفهم فى الكورة ولا بعرف السيكس يارد من خط التسعتاشر ولا حتى عشرين

بس هو من بعد الدقيقة 73 اسرائيل ماجبتش اجوان ولا ايه ؟؟
ولا كابتن لطيف مات من الحسرة

اكملك انا .. هو تقريبا سمعت خير واللهم اجعله خير .. ان اللعيبة كلهم عجزوا بعيد عنك وجاتهلم اصابات وقعدوا على الدكة وما اتحتحوش من مكانهم ..

قووم ايه بقى الجمهور نزل من المدرجات لارض الملعب

وقاعدوا يشتموا فى اللعيبة الاسرائيلين ويحدفوا عليهم طوب .. وحبة منهم قعدوا ينادوا على اللعيبة العرب الى قاعدين على الدكة انهم يقوموا يكملوا الماتش ..

ولو مش قادرين يكملوا يسيبوا مكانهم لحد تانى يكمل .. بس بعيد عنك جالهم طرش فى ودانهم غير ركبهم الى خلعت

فى الوقت ده بقى قامت اسرائيل مضت عقود احتراف مع لعيبة اجانب من بريطانيا وامريكا وعماله تديها اجوان ..

والحكم راح يأيل شوية فى الضلة وادى ضهره للملعب .. اكمن اسرائيل وعدته انها هتخمس معاه فى جايزة البطولة

واللعيبة اليهود ابتدوا كمان يضربوا فى الجمهور الى حاول يكمل الماتش ويقتلوهم كمان

كل ده والكل لسه قاعد على الدكة .. ده غير الى حاول منهم انه يظبط كابتن الفريق الاسرائيلي انه ممكن يبعد الجمهور عن الارض لو خمس معاه فى التورتة

وبس خلاص .. فاصل غنائي مع المطربة الألمعية هيفاء وهبى واغنية (بابا أحححح)

والسلام عليكم ورحمة الله
ويجعله عامر

Mohamed A. Ghaffar said...

كابتن لطيف كان بيقول الكوره اجوان ، وبدام لسه فى ماتش يبقى لسه فى اجوان كمان
فينا اكيد بس بوعد الله احنا هنجيب الجون الأخير الهدف الزهبى الهدف اللى بيكسب وبعد كده تقوم القيامة

يارب اكون فى الفريق ده انا او اى حد من نسلى يارب

Love & Feelings said...

الله ياايمن على جمال الفكره بجد تحفه
عجبني اوي وصف الماتش وصلت الفكره بطريقه سهله و صريحه و جميله و الجميل الفواصل الاعلانيه

يلا في انتظار مباريات اخرى بين الفريقين و ربنا يستر

قاسم أفندي said...

عبد الرحمن
يمكن سدة نفسي عن الماتش هو اللي مخليني مش مقتنع بيها .. جايز !! عموما كانت فرصة سعيدة اننا نعرف عيد ميلادك وكل سنة وانت طيب عشان علي ما يجي نوفمبر اكيد هانسي
:)
وشك حلو ... زيي تمام انت عارف طبعا انا مواليد سنة كام
****************
يعقوب
أشكرك وسلم لي علي أكرم
***************
بنوتة
الحقيقة معظم تعليقاتك بتبقي تستاهل اني أعدل البوست وانزلها بس انا مكملتش الماتش لاني حسيت فعلا انه بقي متشفر ومحدش فاهم حاجه .. ماهو مش معقول الخنوع يبقي للدرجة دي
****************
عبد الغفار
يارب أنت وانا
اللهم استعملنا ولا تستبدلنا
****************
أنجي
أشكرك .. كلك ذوق
يارب افضل دايما عند حسن ظنك

eman said...

ماتش حقيقى معبر بس فى كمان ماتش احلى بين العرب وكله بيتخبط فيه فى بعضه فى ماتش الكويت والعراق ودول الخليج اصل تقريبا العرب مش فاضيين غير للماتشات وبس

شخبطة ملوكى said...

الله يا ايمن مكنتش عاجباك ازاى دى
بجد تحفة و ربط رائع و الاسقاط متوافق مع الفكرة تمام و مش حاسس بتكلف فيها بجد

عبد الرحمن
واحشنى يا راجل بس مكنتش اعرف انك مواليد سنة 17
عمنا القافية تحكم بس كان لازم تقول انك من مواليد 83 مثلا عشان الناس لحسن توقف سوقك كده

تحياتى يا ايمن وكل الاعجاب لك و لفكرتك الجميلة التى سبقت الاحتجاب