النهاردة فرحي يا جدعان

الظاهر البوست اللي فات زعل ناس كتير مني ، اللي قالك ايه ياعم السلبية دي كلها واللي قالك هتودينا في داهية ايه المظاهرة اللي انت عاملها دي واللي سأل ببراءة: هو كل من أيد الرئيس بقي منافق؟ وفي اللي خاف وقرر ميجيش يزورني تاني .. واللي قال حرام عليك متحرمناش من قلمك (ولو انه يعني قلم فرنساوي مضروب بيشحر وقرب يخلص ووالله ما اعزه عن أي حد!!) طيب اذا كنتم انتم يا اصحابي وحبايبي زعلتوا كده .. حبايبنا الحلوين في المجلس الموقر ممكن يعملوا ايه؟؟ عموما احتراما ليكم ونفاقا أقصد احتراما ليهم قررت أعتزل الكلام في السياسة واعيش حياتي بقي .. .. بلا دستور بلا اشتراكية بلا وجع قلب.
أول ما فتحت الدكانة دي والله كان غرضي أنشر عليها مؤلفاتي العظيمة من القصص الفاشلة، جايز الاقي حد يشجعني ولا يتبناني ويقولي الله الله يا سي محمد )علي رأي صديقي العزيز عبد الغفار(، و لكوني مجرد أحمق آخر (غيرك) يحسب نفسه أهم كائن في الوجود، ونظرا لأن الغضب حماقة يا حورية، فطبيعي طالما اني أحمق فكان لازم "اتحمق" شوية.. لكن ما علينا والله غفور رحيم .. ننسي اللي فات واحنا ولاد النهاردة .. واللي فات مات وفي ديله سبع لفات، ونصلي ع النبي ونفتح الدكانة من تاني عشان منزعلش حد مننا، ومش بس نرش مية، لأ ونعمل ليلة كبيرة كمان ورقص ومغني للصبح .. ونعلق الكهارب ونعملكوا صوان كبير و"مرسح" كمان وأجيبلكوا سنية شخلع تحيي الليلة كمان، وعلي رأي يوسف بك وهبي .. ما الدنيا إلا مرسح كبير... هئ .. أنا جدع

من صغري والله وانا غاوي مرسح .. من أيام جورج أبيض ومرورا بالريحاني ويوسف وهبي ... اييييييييه مفيش أحلي من الفن الجميل بس للأسف الناس دول مع احترامي ليهم بس دمهم كان تقيل أوي .. متخشبين كده وعايشينلي في الدور والفن رسالة ومش عارف ايه وواخدنها جد أوي وفاهمين نفسهم بيخترعو الذرة ياخي .. .. المسرح القومي عدًى عليه مثلا ماري منيب وأمينة رزق وسميحة أيوب .. تلاقي الواحدة من دول ملهاش علاقة بالانوثة ولا هاين عليها تورينا حتة لحمة ويوم ما تدلع تقولك "أنتي جاية أشتغلي ايه؟" ... يا سم
النهاردة أحلي من امبارح، الفن النهاردة اتطور نفس التطور الطبيعي للحاجة الساقعة .. وسنية شخلع أخذت دور البطولة المطلقة .. وهو ده الكلام .. رقص وشخلعة والجمهور مبسوط وبيسقف وبيرقص .. والله الله يا ست .. أعد .. أحسنت .... صحيح الجمهور بتاع زمان معدش معاه فلوس عشان يدخل يتفرج بس سمعت ان فيه شلة منحرفة قدروا يلموا من بعض ويشتروا كم تذكرة ويدخلوا يتفرجوا علي المسرحية .. أخوانا دول معجبهمش العرض وقال ايه عايزين ينزلوا سنية شخلع من ع المرسح ... ياخي هأو .. كان غيركم اشطر .. من هنا ورايح التذكرة يا معفنين بخمسمية جنيه وابقوا قابلوني لو عرفتو تدخلوا المسارح المحترمة دي تاني .. جتكو البلا مليتوا البلد .. جمهور واطي صحيح ومبيطمرش فيه قاعدة اهزلكم في وسطي لما وسطي اتخلع .. وريتكم اللحمة البيضا اللي عمركم ما شوفتوها يا جعانين لا ايام ماري منيب ولا غيرها، ضحيت بشبابي عشان خاطركم ومرضيتش حتى اتجوز... ويكون في معلومكم سنية شخلع مش هتبطل رقص ولا فن والبت الحيلة بنتي هتكمل من بعدي ده بعد الشر يعني لو جرالي حاجه .. واللي مش عاجبه يبطل هو فرجة ... !!
محدش يسألني أيه العلاقة بين عنوان البوست وسنية شخلع
تقريبا كده والله أعلم أنا أتخبلت في نافوخي