Saturday, March 10, 2007

غربة

هب أنك تسكن مع والدك في بيت تفترض أنك تملكه أنت وأبوك وليس ملكا لأبيك فقط، وهب أيضا أن والدك هذا رجل مستبد أرسلك إلي أحقر مدرسة ولم يأتي إليك إلا بالسيئ والقليل من الطعام ولم يذهب بك إلي الطبيب حين مرضت، يعذب إخوتك الصغار، يفرض أتاواته علي إخوتك الأكبر منك سنا، يذهب بأختك إلي سوق النخاسة لمن يدفع أكثر، يبيع إخوتك الرضع إلي من حرموا من الأطفال.... إلي أن بلغت سن العمل فإذا أنت وحيدا لا تملك إلا القليل فلا أنت تعلمت كما ينبغي ولا أنت تتمتع بصحة جيدة حتى تواجه ظروف العمل وطبيعته الشاقة. فلم تجد أمامك إلا ما يعرضه عليك أبوك للقيام به من أعمال شاقة داخل البيت ليعطيك في نهاية يومك إذا أراد كسرة خبز. عينك تتطلع دائما إلي أقرانك من أولاد الجيران فأنت لست أقل من أي منهم بل تفوقهم ذكاءاً وقدرة علي العمل ولكن حظك العاثر أوقعك مع هذا الأب. تقرر بينك وبين نفسك التغيير .. تسهر كل ليلة لتقرأ وتتعلم .. تقترض حتي تتعلم وتتقن حرفتك في انتظار الهروب من بيت أبيك..
وفي لحظة ما قابلت جار لك فعرض عليك العمل معه بعشرة أضعاف ما يعطيه لك ابوك اضافة الي رعاية صحية وسكن مؤثث وفوق كل هذا ستعمل في مهنتك الحقيقة.
شردت بذهنك .. تربطك عاطفة ما بأبيك .. مهما كان قاسيا أو جائرا .. لا زلت ترتبط به إرتباطا غامضا مهما غصبك حقوقك أو ظلمك. لكن تتملكك قناعة في لحظة ما أنه بأسلوب تعامله معك هذا فهو يطردك من البيت الذي هو بيتك أيضا .. نعم بلا شك هو لا يرديني .. يطردني .. نعم أنا لست جبانا ولا هاربا .. أنا مطرود
تذهب إلي جارك .. تكتشف آدميتك التي كنت قد نسيتها طوال أقامتك في بيتك .. تتفوق علي أقرانك من ابناء الجيران وحتي أولئك الذين جلبهم جارك للعمل معه من كافة بقاع الأرض..
في لحظة تشعر بأهميتك تندم علي ما ضاع من وقتك في انتماء زائف تجاه بيتك الذي يفسده أبوك بتصرفاته المستبدة والطائشة .. تحار لا تدري ماذا تفعل ...ما بين الحنين إلي بيتك وأخوتك الذين لا زالوا بالأسر وبين الواقع الذي تعيشه الآن ...
تكره الغربة و تتمنى العودة ...
تبغض الفشل و تعشق النجاح ...
ها أنت قد عرفت قيمتك وقيمة عملك ومجهودك ووجدت أخيرا من يحترمك ... فهل تبيع هذا وتشتري قلبك الذي أبي أن يغترب معك وآثر أن يظل حبيسا مع من يحب حتي وإن ظلمه أو طرده؟

30 comments:

كلبوزة لكن سمباتيك said...

السلام عليكم
ازيك
صراحة الاعلان بتاع المسجد الاقصى مغطي على البوست مش عارفة اقراه
يا ريت تصغره شوية او تخليه الجنب التاني

منتظرة التعديلات علشان اجي تاني اقرا البوست

و انت ازيك عامل اية؟

Rania Lelah said...

كلامك هادى و جميل و بيوجع قوى بس لا

لا طبعا متشتريش قلبك
محدش هنا بيقدر اى حاجة
كل الى فلحين فيه بس نقدر السياح و العرب انما ولادنا مبنعملهمش اى اعتبار
مبقتش مصر بلدنا بقت مصر بلدهم هما
خليك زى ما انت لحد مصر ما تتعدل و تعرف تقدر ولادها و تعرف تعملهم ازى
دة رايئى الشخصى
اة نسيت
مستنية تعليقك على الاملاء بتعتى
متهيئلى اتحسنت
اصلى خلاص ادمنت كدة
هههههههههه

قاسم أفندي said...

سمباتيك
وعليكم السلام ورحمة الله
حصل يا فندم وأي خدمة
انا الحمد لله كويس
وانتي أزيك وأزي أبلة أنشراح ؟
___________
رانيا
أشكرك علي مجاملتك الرقيقة ونصيحتك الغالية، يعني مظنش ان البلد بهذا السوء اللي أنا صورته في كلامي بس ساعات الواحد بيكون اتخنق أو أتأثر بموقف معين خلاه يكتب الكلام ده
وأهو تبرير للهروب برضه
:)
خطك اتحسن كتير علي فكرة وبطل يشرب من الترعة زي زمان

شخبطة ملوكى said...

نعم يظل الحنين و الاحساس بالغربة خارج البيت الذى تربينا فيه و عنا به طفولتنا و ايام الصبا
اتفق معك فى كل ما كتبه قلمك الجميل و ان كنت اعتقد ان النهاية و المفاجاه الكبيرة ان من ظنه الطفل اباه يظهر فى نهاية القصة بمفاجاة دراماتيكية تزلزل الارض انه زوج امه الذى يكره اباه منذ الصبا و ان والده توفى قبل ان ترى عيناه النور
جميلا كعادتك يا ايمن باشا

Anonymous said...

عارف يا عمدة لو مكنتش أكبر مني ولك عندي مكانة خاصة ،كنت قلت لك يخرب عقلك :D

جميل يا عمدة ... بس في المقابل في شاعر نفسي الاقي له اي أثر ع النت من دواوينه مش لاقي ، اسمه عصام غزالي او الغزالي ، بيتكلم عن البيت والغربة والانتماء بشكل ساخر فشوف مثلا قال ايه

بلادي وان جارت علي تهون ... وتبيعني فأبيعها وأخون

جميل البوست يا عمدة

eman said...

حلوه بجد كتير بس فى رايى ان مكانك مع اللى يقدروك همه حقيقى اهلك وناسك بجد واللى ما يقدركش انساه يا هترجع تندم العمر كله

قاسم أفندي said...

شخبطة ملوكي
والله يا طارق فكرة جوز أمه دي مية مية لو كانت خطرت في بالي كنت عملتها بصراحة
ههههههههههههه
_________________
عبد الرحمن
ربنا يخليك يا جادو وميحرمني من عطفك عليا .. مش عارف لما بتكلمني بتحسسني أني طه حسين مثلا ولا العقاد يا عمي والله انا غلبااااااان
اما موضوع
بلادي وان جارت علي تهون ... وتبيعني فأبيعها وأخون
فانا كان قصدي ان الانسان بيبيع قلبه بس اللي هو ملك خاص به أنا بيع الوطن وخيانته لالالالالا مهما حصل ويحيا سعد

قاسم أفندي said...

ايمان
أشكرك
هو غالبا بيبقي الموضوع اجباري مفيهوش خيارات لأن العودة بتعني غالبا النهاية .. نهاية الحياة مش الجوع بس
بالنسبة للأهل والناس فأنا أختلف معاكي دول بالذات عمرهم ما ينفع يتبدلوا وبيظلوا دائما وأبدا هم العصب الرابط بين الانسان وبلده
منوراني

MAKSOFA said...

برضه بحبك يامصر

koukawy said...

مش يمكن اخواتي يجوا لمرحله و يعملوا هما كمان زيّ و ده هيبقي اصعب لأن هيبقي فيه شتات

Anonymous said...

بجد من احلى ما قرأته لك ، فعلا عجبنى قوى التشبيهات الرائعة ،
اعتقد ان الحنين هيفضل جوانا ، انا ايضا بأفضل فكرة انه يكون جوز ام ، مش بس علشان الاب مبيأساش على اولاده لهذه الدرجة لكن علشان حتى لو الاب كان قاسى هيكون كده علشان مصلحة اولاده او ظنا منه انه بيعمل لمصلحتهم و ده طبعا غير متوافر فى الاب اللى بتتحدث عنه ، فى رأيى سيظل الحنين موجود ، الحنين للاخوة و للبيت و للاماكن اللى اتربينا فيها ، و لكن يمكن ناس من كتر حبها مترجعش علشان تحاول حافظ على الشعور بالحب و الحنين للبيت و خايفة رجوعها للقسوة و الذل و المهانة يقتل اى شعور كويس لسة باقى

Bella said...

احساس مرير جدا ان يشعر الانسان بالغربة داخل بيته
واحساس اكثر مرارة ان يقسو عليه اهله المفترض فيهم ان يعطفوا عليه

ولكن في المقابل لايملك الانسان ان يغير امه او ابوه حتى لو كان قاسيا ولايملك الا ان يحتملهما عسى يقض الله امراً كان مفعولاً وتنزل الرحمة في قلب الاب القاسي المستبد المستغل ويتغير

او يحدث اي تغيير من عند الله

فبلادنا لو تركناها جميعا لصارت خربة ولما وجدنا من يهتم بإخوتنا الصغار الذين يحتاجون لرعاية وتربية حتى يصلوا لبر الأمان.

حتى لو كان الاب قاسيا فيظل هو الاب ولن يسامح الانسان نفسه لو ترك اباه مثلا ليموت وحيدا
وقتها فقط سينسى قسوة هذا الاب ولايتذكر الا انه ابوه .

بلدنا تحتاجنا وحتى وإن قست علينا فمن العقوق تركها تموت وحيدة

Anonymous said...

نعم مازال الاب يقسوا و لم يتوقف عن اساه .. و رغم قساوته فمازال بداخل قلبنا نبض بحبه و حنين لحضنه القاسي الدافيء ..و رغم صعوبه اصلاح تلك الاب إلا اننا ابدا لن نيأس بل ستظل ايدينا الناعمه تمتدد إليه تحنوا عليه رغم وجود نا مع هذا الجار نرتوي و نزوق مع جارنا الغالي الحنون ما لم نزوقه من قبل مع الاب
و سيكون جارنا الغالي الحنون هو سبب وحشتنا لتلك الاب الغالي الذي هو لا غنى عنه او هو قدرنا .
اخي الغالي في الغربة ...الغربة الجميله عند الجار الغالي حنين قلبك ظاهر بين نقاط كلامك . و لكن كالمعتاد عظمه على عظمه يا كاتبنا الجميل .
في انتظار روائعك كالمعتاد

basma saghir said...

معتقدش ان الحنين ممكن يكون لشخص الاب بس ممكن يمون للمكان الانسان بيرتبط بالمكان حتى وان كان عاش فيه ايام صعبة بس لان مع الايام الصعبة اكيد في ساعات حلوة..تلاقي الانسان بيحن للمكان ده وهو مستغرب جدا من نفسه ويقولوله الناس صحيح القط ميحبش الا خناقه بس في الحقيقة هو بيكون مشتاق للمكان ولذكريات المكان الحلوة
بس خلاص
وانت عامل ايه..مبتجيش ليه.. مش تبقى تيحي

-_- said...

معنديش مشكلة ابدا انى اتغرب في اي بلد اذا حسيت انى مش قادر اعيش حياتى اللى اتمنتها في بلدي

التشبيه في القصة رائع

Anonymous said...

هاى قاسم افندى البوست بجد حلو انا عن نفسى مجربتش احساسى بالغربه الفعليه بمعنى انتقال الجسد من مكان لمكان تانى لكن ممكن نكون بنحسه مع نفسنا واحنا فى نفس المكان يعنى مش شرط تكون غربه وطن اما عن سؤالك فانا عن نفسى مع انه ينسى قلبه ويبتدى فى مكانه الجديد مع ناس هتقدره وتقدر عمله ومجهوده وهو كده مده مش لاقى حب فى مكانه فيمكن يلاقيه هناك وبس
باى

قاسم أفندي said...

مكسوفة
أهلا بيكي
الحيرة اللي عنده هي بسبب حبه لمصر والمسألة مش مسألة مزايدة الموضوع بيبقي حياة أو موت أحيانا كثيرة وأنا أعتقد في أنه من الأفضل أن يكون عضوا فعالا له حيثية وقيميته في مجتمع غريب عليه خير من عضو خامل غير فعال في مجتمع يحبه .. في النهاية سيشعر بقيمته كأنسان
أشكرك
_______________________
كوكو
للأسف هو ده اللي بيحصل لما البلد متقدرش أبناءها وتلاقي التقدير بيروح لفئة من الحثالة سواء في الفن أو في كرة القدم أو في السياسة .. هذا أذا ما أطلقنا مجازا علي تلك الأنشطة الممسوخة مثل هذه المسميات من فن أو كرة قدم أو سياسة
منورة عشتي
:)
______________________
باكي
عارفة لما راجعت نفسي لقيته مينفعش يكون جوز أم .. ليه لأنه مرتبط بينا واحنا مرتبطين بيه أرتباط دم ..
أشكرك لكلامك الجميل وذوقك
ومعاكي حق في الجزء الأخير من رسالتك
فعلا
أوقات الانسان مبيحبش يرجع عشان يحافظ علي الصورة الجميلة في عينه وخياله
منوراني
_______________________
Bella
أولا برحب بيكي في أول زيارة أو تعليق عندي علي ما أعتقد ما لم تخوني الذاكرة
ثانيا عجبني تعليقك جدا بس صدقيني محدش بيحب الغربة ولو سألتي أي مغترب هيقولك أنه نفسه يرجع .. قد يكون تخاذل أو يأس من الاصلاح أو تواكل علي الاخرين بالتأكيد فيه جزء سلبي بس فيه جزء ايجابي برضه
أشكرك واتمني اشوفك منوراني كتير
________________
جوجو
اولا فين المدونة اللي وعدتيني هتعمليها؟
وبعدين انتي ماشاء الله تعليقك احلي من الموضوع نفسه .. عايزين نطلع المدونة للنور بقي عشان نشوف الحاجات الحلوة دي وباسهاب
أشكرك لذوقك ومجاملتك
نورتيني
_________________
بيسو
حمد لله ع السلامة والله وحشتيني وانتي اللي بقالك كتير مش بتيجي انا لسه كنت عندك من كام يوم بامارة ما كنتي عازمة اصحابك عندك أشرف وهبة
عموما أنا زبون دايم عندك يا فندم وخصوصا انتي عارفة اني بيعجبني اسلوبك في الكتابة جدا
شرفتيني
___________________
شارم
الغربة صدقني مش بالسهولة دي ..رجالة بشنبات والله وعيطو بالدموع علي كتفي
اشكرك لذوقك ومجاملتك
نورتني
___________________
بونبوني
هاي ورحمة الله وبركاته
فعلا غربة النفس اصعب من غربة الجسد بالتأكيد معاكي وبأيدك في كده
اما انه يضحي بقلبه فده ثمن كبير أوي مش سهل برضه .. أكيد هيفضل في حيرة وعذاب
أشكرك لذوقك وأتمني أشوفك عندي كتير
_____________
أشكركم جميعا شرفتوني

hamasat said...

قاسم افندي
البوست جميل جدا وحقيقي معبر عن واقعنا مع بلدنا ونحن كمغتربين تمكنا بكفائتنا من الوصول لما نستحق فالمفروض نواصل في نفس طريق النجاح ونحاول بقدر الامكان ان نعكس اثار نجاحنا علي باقي الاسرة بمحاولة الخير يعم بمعني انت في الخارج حياتك افضل مستمتع بها الي حد ما لوجود الاحساس البشع بالغربة ولا يقدر مدي ازعاجه الا من اغترب سنوات طوال لك دخل افضل يوم ما بتحوش فلوسك واستثماراتك عندك في الغربة ولا بتبعتها تستثمر في بلدك؟ مش دا نوع من المساعدة ؟ لما بتنزل اجازة مش بتجيب هدايا للجميع من باب صلة الرحم والتوادد؟ مش دي مساعده للاهل والاصحاب؟ لما بتطلع زكاة مالك مش بتطلعها في بلدك علي اعتبار ان غالبية دول الغربة ليس فيها من يستحق الزكاة ؟مش دا برضه منفعه لبلدك؟وفي حاجات اكتر واكتر ممكن نخدم بيها بلدنا واهالينا
لماذا لا نحاول كل منا وصل لمستوي علمي معين في مجال تخصصه واصبح ذا خبرة لماذا لا نحاول نقل كل جديد للشباب ونستقطع من اجازتنا بعض الوقت لفتح حوارات ومناقشة كيفية تطبيق افكارنا بطريقة عملية ؟من خلال متابعتي لبعض البلوجات والتعليقات لاحظت ان هناك العديد من الشباب دماغ فاضية ياجماعة الدنيا مش بتتاخد فهلوه وهزار في كل حاجة في حاجات كتير جدا لازم ناخدها علي محمل الجد لو عايزين نتغير ونغير
تحياتي لانشغالك الدائم بمحولة التفويق من الانسطال اللي فيه معظم شبابنا يا خساره

بنوتة من وسط البلد said...

أقسى ما فى التشبيه .. هو الاحساس بالغربة والواحد جوا بيته

وتلاقى ضيوف بيتك بيتعاملوا احسن منك .. وياكلوا كل الاكل الى فى التلاجة .. وبيناموا على سريرك .. وبيستخدموا حمامك .. ومطبخك وصالونك

وتلاقى نفسك بتاكل بواقى الاكل الى اتفضلت بعد ما كلاب ضيوفك اكلوا .. وبتستاذن علشان تعرف تمشى فى صالة بيتك واذا فتحت بقك تترمى جوا صفيحة الزبالة علشان تبطل تفتح بقك تانى وتتعدى على ضيوفك الى هما بقوا اصحاب بيتك واسيادك

وهما ولا ضيوف ولا نيلة .. هما شوية كلاب مش لاقيه حتة تلمهم

david santos said...

Hello!
This work is very good, thank you
have nice week

مسلم said...

قاسم أفندي

السلام عليك و رحمه الله و بركاته

موضوعك جميل

هو انا فهمت كده الموضوع إنه إسقاط علي حياتنا كلها

و طبعا بما إنه كده

فأنا عن نفسي هبيع..لأول شاري يقدر تمني و ينمي موهبتي و يحترم قدراتي

بس بعد إذنك لي تعليق واحد

لو فعلاً أبويا هو اللي كده... والدي يعني...مش هقدر أغيره و هيفضل والدي

و هفضل إبنه اللي بيبره زي ما أمرني ربي

أنا قصدي...إن يعني مثال الوالد ممكن يكون يعني مش في محله

لكن نقطتك واضحه جداً و أنا فاهمها

جزاك الله خيراً

35L said...

أدعوكم جميعا للمشاركة فى البلوج بتاعى...موضوع مهم بدأت فيه....و أحتاجكم معى

شــــمـس الديـن said...

ماشاء الله بجد

التدوينة غاية في الروعة الجمال

علي فكرة هو زوج ام ...بس الفارق ان اللي موجود دلوقتي اعتصب البلد من اهلها و عاث فيها فسادا و افتكرها انها وسيتة فقط و الباقي عبيد عندة

عامة انا بظن ان ارض الله واسعة و طالما الواحد في بلد علي الاقل بتتكلم لغتة اديها شغالة ... هو لا عيب ولا حرام اننا نروح للي يقدرنا ...بس الخوف اننا نفقد في خضم العمل الذي لا يرحم ادميتنا ...في اننا ميربطناش بس غير المصالح مع الناس دول ...

و للاسف غالبا ما بيقدروا الاجنبي اكثر من المصري في المرتب و في كل شئ حتي لو قبرتك احسن ... يعني الموضوع زيما له عيوبة له مزاياه

و لكن ما اخشاه حقا ان نذهب جميعا وراء لقمة العيشو نسيب البلد دي اللي ميستحقوهاش ... ساعتها فعلا هتبقي جحيم لا يطاق ... و اللي هيفضل فيها هو اللي هيدفع التمن

مناروع التدوينات التي قرأتها ... مع خالص تحياتي

كراكيب نـهـى مـحمود said...

عن الوطن تتحدث
عرفت ذلك منذ السطور الاولى رغم تغيرك لرمز المحتكر وهو ان بلدك هو الام
مش عارفه سؤال محير ومؤلم ولن تجد له اجابة قاطعه وتضمن انها صحيحة تحياتي ويا رب يهدي هذا الاب يمكن ...

قاسم أفندي said...

همسات
أشكرك علي تعليقك الرائع بس أحب أوضحلك حاجه :
انا كانت نظرتي متشائمة جدا للجيل الجديد وأقصد بهم من هم دون الخامسة والعشرين تحديدا .. لكن والله ومن خلال احتكاكي مع كثير منهم من خلال المجموعات البريدية والمدونات أكتشفت اني كنت غلطان تماما في هذه النظرة والحمد لله شباب مصر بخير لسه وأقرب مثال علي ذلك شوفي التفاعل اللي حصل منهم مع حملة الأقصي .. يمكن اكتر من تسعين في المية من المتحمسين دول شباب كلهم لسه صغير رغم انهم اتظلموا كتير عن جيلنا احنا اتظلموا باللي شافوه ع الانترنت وع الدش واتظلموا بالاهالي اللي مش فاضينلهم واتظلموا حتي باللعب في الشارع بحرية .. بس والله فيه امل وامل كبير كمان ..
أشكرك وسعيد جدا بدوام التواصل
________________
بنوتة وسط البلد
مش عارف أقولك أيه
تعليقك أقوي من البوست نفسه
معنديش حاجه أقولها بصراحة
من حق
لميتي فتافيت البقسماط ولا لسه؟
:)
__________________
david Santos
والله انا خايف لتكون فيروس
عمت مساءا
_________________
مسلم
وعليكم السلام ورحمة الله وبركاته
انت فهمت صح الموضوع ملوش علاقة ببر الوالدين
بس عايز اقولك برضه لو حصل فعلا ان اب يعمل كده مع ولاده فاقولك انه يستاهل الحرق
أشكرك لتعليقك الجميل .. شرفتني
___________________
35l
موضوعك جميل وانشالله أعرف أشاركك فيه قريب .. ربنا يوفقك يارب
__________________
شمس الدين
أخجلتم تواضعنا يا دكتورة والله
أشكرك
بعد التفكير شوية في مسألة جوز الأم دي لقيتها متمشيش لأنه للأسف من دمنا ولحمنا
المشكلة ان مصر بتخسر كتير أوي من العقول الهربانة أو المطرودة دي لأن مع الاسف الشديد مفيش حد بيرضي يشغل الفشلة .. فبالتالي كل اللي برة تقريبا ناجحين ولو حصل وفشلوا بيرجعوا تاني .. مش بقول ان كل الكويسين برة بس بقول ان كل اللي برة تقريبا كويسين وبيبنوا ويفكروا لغيرهم اللي بيعرف يستفيد منهم كويس
طب بالذمة مش حرام وخسارة؟
وعلي فكرة لو سألتي أي حد من اللي برة دول هيقولك أرجع من بكرة لو حال البلد أتصلح ومستعد اخد ربع مرتبي برة يعني الموضوع مش بالاساس مادي والله عند الغالبية
أشكرك جدا علي ذوقك وتعليقك الجميل
_________________
نهي محمود
أهلا وسهلا بيكي
نورتيني
الوطن في حد ذاته عمره ما بيظلم ولاده عشان كده بيشبه الوطن بالأم بتولد وترضع وتربي وده هو دور الأم .. أما التربية والأنفاق فهي من اختصاص الأب بالدرجه الأولي .. الأب هنا يرمز أكثر إلي السلطة منه إلي الوطن
ربنا يصلح الحال
أشكرك واتمني رؤيتك دائما فبالتأكيد شرف لي مرور مدونة رائعة مثلك عندي هنا

كلبوزة لكن سمباتيك said...

انا عارفة الراجل الاب ده راجل فظيع لا يطاق بس الواحد بيحب البيت بكل سلبياته و بيحب اخواته
انا شخصيا هربت من البيت و سبت الاب ده و اتغربت
صحيح بحن ارجع لذكرياتي بس مبحنش للاب ده

حلو قوي المنور اقصد المسقط اقصد المزنق اللي انت كاتبه ده

فنان يا نجيب يا ولدي
خالتي انشراح بتسلم عليك و بتقولك رجع زقم المخدة اللي استلفته جايلنا ضيوف

تحياتي

جبهة التهييس الشعبية said...

القصاص لأسرانا الشهداء رجاء التوقيع وارسال الرسائل

Bella said...

انا متابعة بشكل منتظم لمدوناتك

ولكني لااضيف تعليق الا اذا كان فيه اضافة بالفعل وليس رغية في التعليق وخلاص

اسلوبك في الكتابة يعجبني

hamasat said...

عزيزي قاسم اولا سلامة قلبك :
انا رديت عليك في المدونه بتاعتي ببس حبيت اسيب لك نفس التعليق عندك هنا خوفا انك ما تزورنيش تاني قريب والحقيقه كما قلت الحاجات دي لو ما طلعتش لوحدها ما لهاش طعم زي الهديه اللي بيهاديها الزوج لزوجته ما ينفعش هي تطلبها منه بلاها احسن ولكن
ان الابن الواجب عليه يصرف علي اهله والبنت لاء اعتقد ان لم اكن مخطئة ان هذا عرف وعادات وتقاليد وليست من الدين في شئ
الاهل عندما يربوا الابناء لا يفرقون بين الابناء في اي شئ سواء بنت او ولد وعند زواجهم لا يفرقون في المصاريف عليهم وعندما وصانا الله في القرآن بالوالدين لم يوصي الذكور بوالديهم دون الاناث ولا في احاديث الرسول عليه الصلاة والسلام
في نفس الوقت هذا الزوج هو الذي يعمل صحيح وقد تكون الزوجه عامله ايضا وان لم تكن فهي ايضا عامله في بيتهم هي تنجز عمل المنزل من كل شئ حبا في زوجها واولادها واحتسابا اجرها عند الله هي تنشئ وتبني الابناء وتربية الابناء ليست بالمسئولية البسيطة هي تبني الناحية العلمية والثقافية بغض النظر عما يؤخذ بالمدرسه هي تبني الناحيه الاخلاقيه وفي الغربة هذه معضلة كبيرة لانك تنشئ ابناء بقيم واخلاق عكس البيئة التي ينشئون فيها اقصد غياب القدوة من الاهل والجيران والمجتمع المحيط في الغربة تريد الحفاظ علي لغتك ودينك وتريد لابنائك ان يكونو مثلك ان لم يكن افضل وهذه ايضا مسئولية الام خصوصا هناك العديد من المدن لا يوجد بها مدارس اسلاميه والبعض لا يستطيع ان يوفر المادة لالحاق ابناءه بها الام عليها مسئولية توفير الاستقرار النفسي لابنائها وعند تعدي المرحله الابتدائيه علي كاهلها توفير وقت خاص للابناء في سن المراهقه لاحتوائهم بما يطرا عليهم من تغييرات وما لديهم من مشاكل وما يواجههم من تحديات يتعرضوا لها بالخارج سواء من طلبه وبعض الاحيان من مدرسين بطريقة غير مباشرة طبعا
اليس كل هدا عبا ملقي علي كاهل هذه الزوجة مع انشغال الازواج معظم اليوم اذا هي شريكه له في كل مالهما الاثنين عاملين حتي لو لم تكن الزوجه تعمل بالخارج وهي ايضا متغربه من اجله ومن اجل الاسره
وما ذكرته عن اهل الزوجه صحيح اتفق معك فيه تماما ولكن هو احساس الزوجه نفسها الاب والام دول اللي تعبوا عليها وربوها كويس واكرموها ما مردود هذه التربيه اليس لهم حق في روئيتها اليس لهم حق ان تودهم وتراعيهم في كبرهم وان كان ليس بمقدورها رؤيتهم اليس من حقها مهاداتهم سؤال بسيط من وجهة نظرك ما اوجه البر التي قد تبر بهم الزوجهاهلها ان كانت مجبرة علي الابتعاد عنهم لسنوات طويله؟؟؟

March 14, 2007 6:15 AM

fanty said...

قاسم أفندي، دي أول مره أدخل علي البلوج بتاعك و عجبني قوي، انا عرفتة عن طريق مدونة قهوة يعقوب و بالمناسبة يعقوب ده مش حئولك ذي أخويا لأنه أخويا فعلا، متربيين مع بعض من أولي ثانوي و دلوقتي بقينا جوز حلاليف فاضلنا خطوتين تلاتة و نوصل سن التلاتين، يا نهار أزرق داحنا كبرنا بجد يا واد يا يعقوب.... المهم يا قاسم عشان منخرجش عن لب الموضوع، انا بصراحة مع الاحترام التام ليك مكنتش مهتم ب اللي انت كتبته عن السياسة عشان بالنسبة ليا الكلام فيها ولا بيقدم ولا بيأخر، بس لفت انتباهي جدا الموضوع ده و موضوع الغربة، شوف يا قاسم أنا عندي 27 سنة و بقالي 5 سنين مقعدتش في بتنا، يعني يا دوب اتخرجت 21 سنة، قعدت سنة كمان عمال اتنقل بين وظايف تعبانة و لما بقيت 22 روحت اشتغلت في أحد الفنادق في دهب بجنوب سيناء، المهم كنت بشتغل 40 يوم و بنزل القاهرة 10 أيام أجازة يعني يعتبر مش عايش فالبيت، و بعد سنة في دهب و بعد محاولات مني بالحصول علي وظيفة احسن ربنا كرمني و في فندق كبير برضة بعتلي اشتغل فيه في أبو ظبي و كان ساعتها عندي 23 سنة، سافرت يا عم الحج و كان الراتب مبيعملش أي حاجة ذي ما انا كنت مسافر و متخيل انه راتب حلو بس اكتشفت ان المعيشة غالية و الفلوس بتطير بسرعة بس الصراحة تتقال اني يمكن معملتش حاجة في الفندق ده بس كنت عايش عيشة آدمية، بلد جميلة و نضيفة و مفيهاش تعقيد و كل حاجة سهلة و أقسملك بالله ان شعب الامارات محترم بطريقه لا تتخيلها، والله يابني مع اننا بنتسمي وافدين في دولة ذي الامارات بس نعامل بقمة الاحترام، يا راجل ده انا لو كنت لسه عايش في مصر كان زماني بنضرب بالجزم و من مصريين ذي ذيهم، المهم يا معلم مصر اكيد كانت وحشاني جدا و قعدت سنتين بحالهم مش قادر أنزل لحد لما سبت الفندق و رحت الحمد لله وظيفة حلوة جدا أحمد الله عليها و اللهم دمها نعمة عليا و أحفظها من الزوال، المهم في الوظيفة الجديدة شغلي بيكون 3 شهور شغل و شهر اجازة و بالتالي في السنة و نص الأخيرة في شركتي الجديدة نزلت مصر يجي خمس مرات، طبعا أول نزله كانت تحفة، ماهي نزلة بقي يا معلم بعد حبسة طويلة، تاني زيارة برضه كانت تكمله للصياعه، تالت زيارة ابتدي احساس الملل يتسرب ليا و ابتديت اركز مع القرف اللي في مصر اللي كنت بحاول اقنع نفسي اني مش شايفة اول زيارتين، رابع زيارة ابتديت فعلا أحس بزهق بعد أول اسبوعين، أما بقي خامس اجازة يا ريس كانت ملل و زهق رسمي وأحساس القرف ابتدي بعد أول اسبوع يعني بعد ما خلصنا بوس و أحضان و الحمدلله بالسلامة و كلنا اكلتين حلوين من أيد الحجة الله يديها الصحة و طول العمر، طبعا مش محتاج أوصفلك بقيت بكره مصر قد ايه، طبعا انا عارف ان كل اللي بيقرا كلامي حيقول اية الشاب اللي عايش في الدور ده و نسي بلدة، أول حاجة مقدرش الوم عليهم عشان انا نفسي كنت بقول كدة علي الناس اللي بتسافر، بس فعلا طلع صح المثل اللي بيقول اللي ميعرفش يقول عدس، ما هو لو الناس جربت تعيش عيشة نضيفة و يلاقوا معاملة بني آدميين بجد ساعتها حيقدروا شعور الناس المغتربة اللي زينا، و طبعا حلاقي اللي يقولي ازاي تنسي مصر اللي علمتك و ربتك و عملت منك راجل، حرد عليه و حاقوله بكل بساطه و مصر دي عملتلي ايه بعد ما انخرجت و فضلت متنيل ادور علي شغل والوظيفة اللي تلاقيها تطلع بملاليم، أنا يا جماعة فعلا بقيت بكره البلد، ايه اللي يجبرني أحب بلد كل ما أكون فيها أحس ان كرامتي بتتهان، و أحس اني بعاني وانا سايق عربيتي فالشارع و أحس اني بكره اليوم اللي اتولدت فيه لو روحت اجدد رخصة ولا أدفع مخالفات و لا حتي أعمل حاجة في السجل المدني، ماهو يا تدفع فالخباثة يا اما تفضل ملطوع، والله مش بخل ولا نتانه واهو كله ثواب عشان موظف غلبان بس لية احس ان الناس بتبتز بعضها في كل حته، وليه اسمع عالم بتسب بعضها في كل حته و يا ويلك لو سواق ميكروباص معجبهوش طريقة سواقتك او انك مش قادر توسعله و بالتالي حتسمع أقذر كلام منه ده لو كمان منزلش اتخانق معاك ولا فتح عليك مطوة؟؟؟؟ حاجة تقرف و عيشة خرة و صبيان خ... كل واحد فيهم ناكشلي شعرة و منزل البنطلون عشان البوكسر المشجر يبان و البنات اللي بقم بيتسبتوا عيني عينك و الدنيا ماشيه حلاوة، ايه القرف ده، شعب منيل بستين نيله بجميع طبقاته، طبعا ولا المساحة ولا الوقت يكفوا اننا نتكلم عن القرف اللي بيحصل في بلدنا عشان كدة محدش يستغرب لما الواحد يروح يشتغل عند جاره و للأسف كمان مشاعرة من ناحية أبوة بتبتدي تموت... وأخيرا آسف لو كنت طولت عليكم