Saturday, January 27, 2007

فاصل اعلاني


(شوارع ... برعاية شللكو *****)

تفخر "شللكو"بتقديم تحفة إنجازاتها العبقرية من خلال شاشة التلفزيون وفي عقر داركم وهتشترو يعني هتشترو ياولاد الهبلة..
شللكو بتقدملكو النهاردة (وبكرة وبعده وكل يوم) ترابيزة المكواة العبقرية "اللهلوبة"..
اللهلوبة غير أي ترابيزة مكواة تانية سكة ..
اللهلوبة ترايبزة المكواة اللي ست البيت مستحيل تستغني عنها وأي مرة وسخة يوصلنا أنها مش بتستعملها هنطلع تلاتة ميتين أهلها...
اللهلوبة .. ترابيزة بأربع رجلين غير بقيت الترابيزات التانية خالص
اللهلوبة .. ترابيزة مكواة تقدري تكوي عليها وانتي بتتفرجي علي التلفزيون
اللهلوبة .. لها سطح معد خصيصا عشان تكوي عليه
اللهلوبة .. ممكن تطبيقها بعد استعمالها واياكي تطبيقها اثناء استعمالها ...
... مش قولتلك غير بقيت الترابيزات المعفنة التانية
اللهلوبة .. مش هتصدقي ... تقدري تكوي عليها قمصان جوزك "البيضة" لما تقع منه وهو بيتفرج علي اعلاناتنا
اللهلوبة .. جايلكم النهاردة بعرض مدهش مش ممكن هتقدري تقاوميه وكمان معاها هدية محصلتش "بافتة" .. تعلقيها علي رقبتك وانتي بتكوي علي اللهلوبة وبتتفرجي علي اعلانتا في التلفزيون عشان متهطليش بريالتك علي المكواة وتبوظي قمصان جوزك
اللهلوبة + البافتة اللوزعية + مصاريف الفقع بتسعمية تسعة وتسعين جنيه بس
أتصلي الآن والا هنعيد الاعلان ده مرة تانية وتالته ورابعة لحد منطلع ميتين أهلك....
أتصلي والحقي الفرصة قبل ما بقية النسوان يجيبوها قبلك ويعايروكي

أحذروا التقليد


أنتي لسه قاعدة بتتفرجي ياروح أمك؟؟


قومي فزي أتصلي يالا



19 comments:

Mohamed Hashem said...

أنا قريت الفاصل الأعلانى ثلاثة مرات و فى كل مره ماقدرتش أمسك نفسى من الضحك، أنا لم أكن أجاملك حين قلت أنك تذكرنى بأحمد رجب و محمد عفيفى ،أمنيتى فقط أن أرى مثل هذه التدوينات بشكل أكثر و ألا تأخذك "شوارع" بشكل كامل..

بالمناسبة ، سأعود للتعليق على شوارع و لكن بتركيز أكثر..

انت تعلم أننى لا أستطيع الصمت لفترة طويلة..

تحياتى و الى الأمام دائماً
محمد هاشم

eman said...

على فكره انا مشتركه جديده وعندى 15 سنه وبجد كتاباتك رائعه واسلوبك جميل جدا قريب من اسلوب احمد خالد توفيق الى حد ما وده بقى انا متربيه على كتاباته وبجد تحفه
تحياتى ليك واتمنى تكتب اكتر
ايمان جمال

كلبوزة لكن سمباتيك said...

كده طيب انا حقلب القناة عليك و اجيب راسك تحت و رجليك فوق

اعلانات اخر زمن

عارف لو عترت فيك و انا بقلب في المحطات حشيل عنك السجنل و تبقى اعلان ازعر

قال مكوة معرفش اية قال

روح يا اعلان العب بعيد
حنرش مية قدام المدونة

---


قاسم
ازيك؟

Anonymous said...

أنتي لسه قاعدة بتتفرجي ياروح أمك؟؟
فعلا تحس من الاعلانات انهم بقولوا كده فعلا و الاخطر من اللهلوبة بتاعة المكوة انهم بيشتغلوا دلوقت على الادوية كمان

قاسم أفندي said...

أعزائي
أنني من موقعي هذا أتقدم لكم جميعا بخالص الشكر علي زيارتكم الكريمة هذه ولو أن كلكم داخلينلي أيد ورا وأيد قدام ولا حد فكر يجيب في أيده زيارة (الزيارة تعني اتنين كيلو برتقال مثلا( عموما نورتوني وشرفتوني والشاي ع النار ..
الحقيقة دي أول مرة أرد فيها علي التعليقات وده الحقيقة مش كرم زيادة مني بس حصل تحت ضغط من أخ عزيز عليا فضحني وشهر بيا في المدونات الصديقة أكمني محدث بلوجات ومعرفش أصول البلوجات وضرورة الرد علي المعجبين والمعجبات وتقريبا والله أعلم أحنا الاتنين أثرنا علي بعض فأنا أهو أبتديت أرد ع الجمهور الغفير (أربعة بس لحد دلوقتي ) الله يكسفكم .. بأدخل مدونات الاقي بالمية والميتين .. هو احساس يصيب بالفرسة والخيبة التقيلة لكن ما علينا .. بارك الله فيما رزق
يالا نستفتح بالله ونصلي علي رسول الله ونقول:
محمد هاشم
أحمد رجب ومحمد عفيفي عمالقة كبار أحنا بعاد عنهم أوي أوي .. ولو كلامك ده وصل لأحمد رجب ممكن يعتزل فيه الكتابة خالص فالله يخليك متحرمناش منه وبصراحة كده انا ممكن أبيعك وأبلغ ورثة محمد عفيفي أنه ممكن يكون مات من قهرته لما سمع البوق ده من ساعدتك

إيمان
أهلا وسهلا
كانت مفاجأة كبيرة أوي زيارتك ليا لأني أولا معرفكيش فكنت أظن ان كل اللي بيزورني هنا هما أصحابي اللي أعرفهم معرفة شخصية أو أصحابي اللي معرفهوش معرفة شخصية بس عديت علي مدوناتهم ودحرجت المسا
بس أحرجتيني جدا اكتر لما عرفت سنك يعني حضرتك أكبر من بنتي بأربع سنين .. مش عارف خليتين أحس أن الكلام اللي بأكتبه لازم أراجعه وأخلي بالي منه .. أشكرك .. وأوعدك هاخد بالي المرة الجاية وأعتذر ليكي بشدة من وجود بعض الالفاظ الخارجة

سمباتيك
أنا متشكر جدا لمتابعتك المستمرة رغم مشاغلك الكبيرة نتيجة المصيبة اللي انتي عاملاها عندك .. بالنوسبة للأعلان فأحب أوضح بس ان مش ينفع ترشي أي مية كده وخلاص لازم مية نار
تحياتشي

شاكر
أنا شاكر يا شاكر
أحب أهديك المقطع ده:
هنيدي: تحب تقول حاجه بمناسبة السنة الجديدة؟
عم "مش فاكر أسمه": حسبي الله ونعم الوكيل
من فيلم جاءنا البيان التالي

Anonymous said...

عظيم جداً ... يبدو ان البعض ما زال يستحسن أرائي التي نسيتها بفعل عوامل الزمن الرديء

بانتظار ما بعد الفاصل

:D

قاسم أفندي said...

عبد الرحمن...
هو ده اللي فتن عليا وشهر بيا في المدونات يا جماعة
وأضطريت أرد عشان خاطره ..
روح يا شيخخخخخخخ
الهي يارب تاخد بنصيحيتي زي ما انا اخدت بنصيحتك
:D

الدبور said...

ههههههههه

انت لمست وتر حساس جدا يا قاسم افندي

دول قربوا يطرقعوا من الاعلانات الغبيه و السمجه دي
يوميا علي جميع القنوات
اشي ترابيزة مكواة علي ترابيزة تليفزيون و دلوقتي شغالين علي عسل بردقوش و عسل سد الجبلي و اي كلام و المشكله اني في ناس هبله و بتصدق وتشتري

تحياتي
الدبور
www.dabbor.blogspot.com

Anonymous said...

واحد مية نار و صلحة لعم الاعلاناتجي

الائيش عندك مكينة فيشار لحسن ابو شنب عامل طبق و ريقي جري
و انا اجري وراه

بنوتة من وسط البلد said...

قاسم افندى
وعبد الرحمن جادو معارف
ايه ده ده الدنيا طلعت ضيقة اوى يا جدعان
عبد الرحمن باشا .. لسه بتكتب كتييير ؟؟ :)
زميلتك فى المحروسة فى عين مامتها
عرفتنى ولا لسه بتخمن ؟؟

قاسم باشا
ايه ام الاعلان ده ؟؟ امال لو ما ماكنتش لهلهوبة كانوا عملوا فينا ايه ..؟؟ كانوا طلعولنا ملط ؟؟

عماد رفعت said...

انت يابني فظيع
انا اول مره ازور مدونتك وبجدمقدرتش امسك نفسي
لازم تقدم لاي جرنال ككاتب ساخر يابني انت فظيع
احنا بنعمل موقع ولازم هاخدمنك حاجات تتنشر فيه بعد اذنك

Anonymous said...

الواحد ساعات بيقرا حاجات بتعجبه قوى لدرجة انى مش عارفة اكتب ايه، الحقيقة انا كمان لسة مقرتش بقية اجزاء شوارع و لكن كل مرة بدخل بلاقى نفسى بقرا الفاصل الاعلان تانى، عجبنى قوى لروعة الاسلوب و لطابعه الكوميدى و لانه بيتعرض لشئ مستفز جدا فعلا و هى الاعلانات الغريبة المستفزة ، اما بالنسبة لقلق حضرتك من الكلام و ان ممكن بنات فى سن بنات حضرتك يقروا الكالم ده فالحقيقة ان الاعلانات نفسها ساعات بتكون اكثر خطورة من ناحية المنتج نفسه و طريقة عرضه،،،،، عجبنى قوى ان بالرغم من اشتراك الفاصل الاعلانى و شوارع فى الطابع الكوميدى الا ان اسلوبهم مختلف و رائع، الحقيقة كل مرة بنبقى فى انتظار مفاجأة جديدة... و اشكرك جدا على تشريفك للبلوج بتاعى و تعليقك اللى اسعدنى قوى...

باكينام ناصر

Anonymous said...

الحقيقة يا ايمن انا لاقتني قمت فزيت اشتري اللهلوبه و كويت عليها قميص جوزي الابيض مع اني عادتا ببعت القميص الابيض لمكواجي ...
بجد فكره جديده مضحكه مصيبه يعني
رجاء المزيد من تلك الاعلانات لاني فوجئت بان بيتي مافيهوش من انواع اللهلوبه دي

إلى الامام يا ايمن
في انتظار الاعلان القادم بس برجاء يكون منتج اخر مفيد
مديحة حاتم من امام كشك عم عبده

جوجو

قاسم أفندي said...

دبوووور
منورني يا فندم والله
هو بصراحة المشايخ اللي بيقولو التلفزيون حرام معاهم حق

سمباتيك
تعبت بقي ...
بقالي تلات ايام باجري وراكي بمكنة الفشار وانتي لسه بتجري ورا ريقك

بنوتة
الله الله
فاتحهالكو كوفي شوب انتي وسي عبدالرحمن افندي !!
أطلبلكو لمون؟
نورتيني

وله نهاية
مستشكرين وربنا يخليك
موضوع النشر ده لو هتدفعو كويس معنديش مانع
انا رقم حسابي 666666 بنك اوف سويسرا فرع كفر طهرمس

باكينام
انا بأفكر أحذف لكم أم الاعلان اللي خايلكم ده
بس هاعمل ايه بس انتي عارفة تمويل الحاجات دي مش بالساهل .. لمي مع صحابك كده وانا افسخ العقد مع الناس دي اللي زلونا بفلوسهم

جوجوووووو
رافعة معنوياتي وقارئتي المستديمة بالذوق او بالعافية .. ربنا يخليكي يارب ومايحرمني من كلامك الحلو ده

بأشكركم كلكم

دينا فهمي said...

مجرد أحمق آخر غيرك يحسب نفسه أهم كائن في الوجود

حبيت بس أبدي إعجابي بالجملة دي (:

basma saghir said...

ياشللي ياشللي من الاعلانات المرارة اتفقعت خلاص

بس والله تنفع تعملهم الاعلانات اهو نضحك شوية بدل ام الشلل الي احنا فيه ده
بس لو بالطريقة هيشهروا افلاسهم في ظرف 24 ساعة بدون مقاطعة قول انشاء الله
سلامي ليك
انا همشي علشان المرارة

محمد عبد الغفار said...

انت ادبست يا باشا خش عندى عشان تعرف التفاصيل

قاسم أفندي said...

دينا فهمي
أشكرك لزيارتك الكريمة و أتمني أشوفك دايما

بيسو
والله فكرة حلوة موضوع اني اعلمهم اعلاناتهم دي
أيه رأيك في دور فتاة الاعلانات ؟ حضرتك عاملة شعرك موزبليه ومعلقة البافتة علي رقبتك وفاتحة بقك والريالة بتهطل وانتي بتتفرجي ع التلفزيون ومبتسمة ابتسامة عريضة ناصعة وانتي بتمارسي متعة المكوة علي اللهلوبة .. وفي نهاية الاعلان تقولي مع اللهلوبة مش هتقدر تبطل هطل


محمد عبد الغفار
متشكرين ع التدبيسة يا سيدي .. كده برضه؟؟ ماااشي أوعدك بمفأجاة يشيب لها الولدان
علي فكرة انا موضوع التاج ده كنت زيك فيه كده برضه بحس ان وداني طويلة كل ما ادخل مدونة الاقيه لحد ما أخونا جادو الله يكرموا شرحهولي وبعدين قريت اللي انت كتبته ففهمت اللعبة اخير الحمد لله

أميرة البلطجية said...

رغم اني مبحبش اعلق عل البوستات اللي فيها شتايم وكده
بس صراحة
اصل انت جيت ع الجرح
فعلا اعلانات تجيب المرارة
هو انا بطلت اتفرج ع التليفزيون من شوية
بس بوست مسخرة صراحة
انا حروح الم العيلة تقراه
بس ربنا يستر ومضربش