Monday, May 21, 2007

راسبوتين

راسبوتين أحد الشخصيات المحيرة للفهم والتي دار حولها جدل كبير، فالرواية المتداولة تتحدث عن رجل دين فاسق عربيد يرتكب جرائمه تحت رداء الدين. والرواية الأقرب إلي المنطق هي تلك التي تتحدث عن شخص مقرب من الأسرة الحاكمة الروسية أبان الحرب العالمية الأولي، استطاع هذا الشخص الوصول إلي شبه إتفاق مع ألمانيا بموجبه تتوقف الحرب الدائرة بين الألمان والروس، مما يعني توقف العمل علي الجبهة الألمانية الروسية وبالتالي تفرغ أكثر من ثلاثمئة وخمسون ألفا من القوات الألمانية التي بطبيعة الحال سيتم الاستعانة بها علي باقي الجبهات وبخاصة الجبهة البريطانية مما يعني هلاك الأنجليز بالتأكيد. فاستطاعت بريطانيا بما تمتلكه من شبكة تجسس خارقة، تشويه صورة الرجل – حسب الرواية المتداولة بشكل شبه بديهي عن الرجل – واستطاعت في النهاية إغتياله علي أيدي الأسرة المالكة ذاتها بالتعاون مع المخابرات البريطانية. هذه هي الرواية الأقرب إلي الحقيقة من وجهة نظري، فلا يمكن للعقل أن يصدق تقريب أسرة ملكية لرجل معروف بالفسق والعربدة حتى أصبح مضرب الأمثال بتلك الصورة التي كان عليها راسبوتين وجعله مستشارا خاصا للقصر ومعروف عنه كل هذا العهر.
وبالرغم من "تبرئتي الشخصية" للرجل إلا أنني لم أستطع محو شبح راسبوتين من مخيلتي عندما أصطدم في حياتي الشخصية بمن هم راسبوتينين أو بمعني أدق من تسهل لهم أنفسهم الرذيلة – علي مختلف مستوياتها – متخفين وراء تلك العباء الدنينة التي تفرض حولهم حصانة تنمع العامة والبسطاء من مجرد الشك في نواياهم. ولعل الظهور بمظهر الفاسق يسهل للضحية التعرف علي ما ستواجهه من أخطار، ولكن هذا التخفي الديني لا يترك مجالا للشك أمام الضحية، تماما مثل ما حدث مع بعض شركات توظيف الأموال، وحدث فيما أذكر أيضا في حالات تحرش جنسي بأحدى دور العبادة المسيحية.
وفي محيط الانترنت حيث الأمر أسهل كثيرا، يعشق البعض تقمص الشخصية الراسبوتينية للايقاع بالضحية، فهي أثبتت أنها أسهل وأقصر الطرق خاصة مع البسطاء. وما أسهل حفظ بعض الآيات والأحاديث الشريفة واستغلالها لفرض حصانة هلامية حول حديثه تمنع الآخرين حتى من فرضية خطأه وتجد هذا منتشرا بغزارة شديدة في المنتديات والمجموعات البريدية. وينساق وراء هؤلاء الراسبوتينين مجموعة من البسطاء حسني النية فينشرون أفكارهم وهم علي يقين وإيمان تام من صحة هذا الفكر ونقاءه، كيف لا وقد قال الله كذا كذا وقال الرسول كذا كذا. وتجد في بعض الأحيان من يقول لك فلان ينطبق عليه قول الله تعالي كذا وكذا ... عفوا أأنتم من أنزلتم القرآن وتعلمون أكثر من الله عز وجل من المقصود بهذه الآية وتلك؟ أتحاسبون الناس وتدخلونهم الجنة والنار؟ وكانت النتيجة فوضى فكرية وتخبط وسيل من البريد الاليكتروني علي شاكلة أبعتها لأصدقائك ولك مليون نخلة في الجنة وغيره الكثير. وتكفير أناس، وهتك أعراض آخرين، وكل هذا وراء تلك العباءة الدينية الراسبوتينية القبيحة التي يلجأون إليها أحيانا بحثا عن الشهرة أو التعرف والإيقاع بالجنس الآخر علي الانترنت نتيجة ضعفه عن ممارسة ذلك في الواقع.
لا أشكك في نوايا الأغلبية العظمى من هؤلاء ولكن أحذر من كل راسبوتين يخفي وجهه القبيح وراء تلك الهالة الزائفة فهؤلاء هم أكثر من يسيئون للأديان.

34 comments:

Love & Feelings said...

فعلا ياايمن الكلام ده انتشر اوي على النت و الحقيقة دا حسب ما بسمع لاني موش هواة و لا احب اصلا اني اشترك في احاديث او منتديات ناس معرفهمش

موضوع غريب .. انا ملحظة ان افكارك بقيت غريبة اوي و كلامك بقى تقيل و جامد كده كل ده من مدن الملح :)
تحياتي

Esmeralda said...

اذا كان فيه راسبوينيين المفروض مانكونش ساذجين
بيعملوا حصار فكرى بشع متقدرش تفلفص منه
و يا سلام لو ثقافتك الدينيه دون المستوى متقدرش تدافع لو شفت انهم بيحكموا حصارهم على حد و تتهم انك مش فاهم حاجه

الايمل اللى منم النوعيه ديه مش بابعتها لحد باحس انه نوع من التهديد بس مانكرش ان بيبقى فيه بعض تانيب ضمير

nile_daughter said...

عزيزى قاسم أفندى
نحمد الله ان راسبوتين لم يدع التفقه فى الإسلام وإصلاح المجتمع او أشهر سيف الأفغانى....يعجبنى ربطك للأمور البعيدة مع بعضها لإجلاء التشابه وارسال ما تموج به نفسك للآخرين...كعادتك..قارىء مدقق تهضم ما تقرأ...دمت كذلك.

Anonymous said...

النفاق بقى قاعدة في حياتنا للأسف ، ومع الزخم الديني اللي صبغ حياتنا كلها ، طبيعي جدا ان المنافق يجد ضالته في سمة لو أكسبها لذاته فسيكسب أرضا تتسع ويزداد جمهورها يوما بعد يوم. وكما ذكرت ، ماأسهل استهلال الكلام بالبسملة والحوقلة والاستعاذات والصلوات والتسليمات لتتدغدغ مشاعر المتدين البسيط وينبهر بالإيمان المستفيض. وهكذا صار الدين كلام ، وبسبب هؤلاء المنافقين المزدوجين اوشكت كل اخلاقيات الدين الصحيح ان تختفي من حياتنا.
لكن في النهاية لهم زلاتهم ، ولهم سقاطتهم ، واهم شئ هو عجزهم عن الاستمرار في ارتداء تلك العباء بشكل مطلق. ضعفهم اللاديني بيتغلب ف النهاية وان كانت الهالة اللي بيرسموها حولهم بتخلي الصدمة فيهم اشد، انما في النهاية ممكن كشفهم وفضحهم ، فقط ان تأكد الجميع ان الدين ليس كلام ، وان الاخلاق ليست فقط نصوص قرآنية او انجيلية.
تحياتي على تحليلك ياايمن ، رائع وفي الصميم كالمعتاد

نهى

شــــمـس الديـن said...

السلام عليكم و رحمة الله و بركاته

كما هي العادة من التدوينات التي احبها لاثرائها العقل

المقالة لها شقين
اولا تشويه صورة راسبوتين ... و صراحة رغم اني لم اقرأ عن هذه الشخصية الكثير الا اني لا استبعد هذا عن السلوك المنتصر الغربي ...
و ذكرتني روايتك عن راسبوتين برواية مغلوطة اخري ... الا و هي عن هارون الرشيد الخليفة العادل الذي كان يحج في عام و يفتح ممالك في عام اخر ... و لك يكن له سوي زوجة واحدة و هي زبيدة ...
و لكن عند انتها ء العصر العباسي الاول لم يكن مؤرخونا علي درجة عالية من الحيطة فتمت كتابة هذا الحقبة التاريخية علي يد المتنصرين المتأمرين علي الحضارة العربية و تمت تشوية صورة هذا الخليفة

اما الجزء الثاني من المقالة انتششار الراسبوتنيين كما تسميهم :)

هذا راجع لعاملين ...
اولا خوف الناس من الثقافة الدينية و اعتبار الانسان المتدين هو من يصلي ولا يدخن و لو واحد ربي ذقنة بلا اوعي اعطو له لقب شيخ !!!

اما الثاني ..الجهل المتفشي و تهميش العمل بما كرمنا الله به و هو العقل ... فاصبحت هذه الفئة نتيجة لعدم اللمامها منذ الصغر بالتعاليم الحقيقية للدين , و للحاجة الفطرية للانسان ان يصبح متدين ,و كرد فعل عكسي لكل المجون الذي يبث عبر التليفاز و اتفسخ القيم ... اصبح النقل دون وعي و التشدد الغير عاقل هو السمة الاساسية و التي يستخدمونها هؤلاء الراسبوتنيين للتأثير و للاسف لجهل الناس اصبح تأثيرهم لا احد يمكن انكارة ... و عندما كنت في الكلية كنت استشعرهم بشدة ...


مقالك رائع بكل المقاييس و استمر علي هذا المنوال الممتع للعقل و الوجدان :)

خالص تحياتي

Rania said...

مش هعرف ازود و لا كلمه عن الى اتقال
لان فعلا الموضوع انتشر و بقى الصوت العالى هو رمز القوة عند بعض الناس و نسو ان العقل و الحكمة هما الاساس
تحياتى

شادي فايد said...

هناك رواية رائعة
لاحمد خالد توفيق
راسبوتين العملاق

هي دي الوحيدة اللي قرتها
ومش فيها حاجة من اللي بتتكلم عنه
الا بعض ملامح القوة و الوحشية
:)

waleed elewa said...

حلو اوي تحليلك و ربطك للامور يا ايمن - زمان فيه واحد قال جمله و اعتبروه كافر و للان . الجملة هي "الدين افيون الشعوب " يعني ايه الكلام ده - الجملة دي جت علي لسان كارل ماركس مؤسس النظرية الشيوعية - انا موش شيوعي و لكن الجمله دي قريبه جدا من الواقع - معناها ايه - معناها ان السلطه و حتي الافراد يقومون باستخدام الدين كسلعة تخديريه و كوجه ساحر مخدر لتخدير الشعوب و تحريكها و حتي توجيه طاقاتها الي ما يريدون - الكلام ده بيحصل حتي يومنا هذا خصوصا ما الشعوب الي بتميل للروحانيه اكتر
و ليا رأي تاني علي موضوع النت - الانتر نت بالتحديد - هذا الاختراع غير من تركيبة و طريقة ممارسات العقل البشري - المعادله بتقول ايه
تخيل شخصية مكبوته او حتي شخصية مركبه وش زائف و علي فكره كلنا فيه حته جوانا ما بتطلعش في حياتنا العاديه - فيه شخص تاني جوانا ما بيتعاملش بيها مع اي حد و مستخبيه
ممكن الشخصية المدفونه دي تكون موش بعيده عن شخصيتك الحقيقيه و ممكن تكون مختلفه تماما عنها
تخيل نفسك بقي في مكان لوحدك ما حدش شايفك و بتكلم حد تاني برضه شخصية اعتباريه لانه فيزيكالي موش موجود ادامك - تخيل مدي قوة و رغبة الشخصية المكبوته جواك انها تطلع و تبان و تمارس حياتها بحريه علي هذا الاختراع
لو الشخصية دي صادفة شخصية مكبوته تانيه خارجه تتفسح علي النت - ما فيش اي مشكله - انما لو كان حظها زفت و قابلت شخصية صادقة مع نفسها و مصالحة شخصيتها المكبوته و الحقيقيه مع بعض - اخخخخ مشكله
فكر في البؤين دول و صباحه عسل

قاسم أفندي said...

انجي
مهم ان الواحد يستوعب الدرس ويتعلم
منه
موضوع ايه اللي غريب ما غريب الا الشيطان
مدن الملح بقي حدوتة تانية خالص .. انا تقريبا وصلت لنص الجزء الرابع واوعدك انشالله اول ما اخلص الجزء الخامس والأخير أكتبلكم عليها تدوينه محترمة .. ياريت بس انشالله لو عشنا تبقي تقريها ومتكسليش زي ما عملتي في حاجات تانيه ومفيش داعي اسيح بقي
:))))
تحياتي
***********
ازمرالدا
معاكي حق بس المشكلة في اننا نقدر نميز الراسبوتينين عن غيرهم من اصحاب الضمير ودي بالفعل مشكلة مش سهلة ومحتاجه فراسة وتفكير وتحليل كبير . يمكن درس الكيميا اللي فات يساعدنا برضه في الموضوع ده
بالنسبة للايميلات متخليش ضميرك يأنبك عادي جدا ولعلمك فيه منها حاجات كتير بيبقي فيها غلطات يعني نشرها هيضفلك أثم مش ثواب
شرفتيني وسعيد بزيارتك
************
Nile Daughter
والله يا دكتورة مشكلتنا اننا بنقعد نزيد ونعيد ونقول ان ديننا مش كهنوتي وكلام كبير جدا، لكن للاسف الكهنة كتروا أوي وكل واحد منهم لا يقبل النقاش ويشهر ما هو أحد من السيف باستشهاده بايات قرانية واحاديث شريفة فان خالفته الرأي فأنت خارجة عن الدين
أشكرك وحمد لله علي السلامة بعد غياب طويل عن عالم التدوين واتمني رؤية الجديد دائما لديك
تحياتي
**************
نهى
ربنا يستر زي ما قلتلك وأعتقد أن الدرس كان مفيد جدا والأدب فضلوه عن العلم ..مش صح برضه؟
بس عايز أقول ان العيب فينا أحنا .. لازم نقرأ ونقرأ عشان نعرف نميز الحق من الباطل
أشكرك وسعيد بتعليقكك

قاسم أفندي said...

شمس الدين
بالتأكيد كتابة التاريخ شيء مهم جدا وفي وقت من الأوقات كانت تراودني فكرة تدوينة خاصة بتشويه التاريخ، وما أكثر ما تعرض لهذا التشويه تاريخنا الأسلامي في العصرين الأموي والعباسي، ولكن كما تعلمين موضوع كهذا يلزم له الإعداد الجيد جدا وهو للأسف ما لم أستطع القيام به لانشغالي، ولكن أتمني أن يحدث في المستقبل انشالله
أعجبني جدا تحليلك للجزء الثاني والخاص بتقبلنا لهؤلاء الراسبوتينين نتيجه جهل معظمنا، لذلك وكما قلت في ردي علي نهى لازم نقرأ ونقرأ عشان نقدر نميز
تحياتي وسعيد بمتابعتك لما أكتب
**************
رانيا
فعلا معاكي حق ثقافة الصوت العالي طغت بغزارة علي مجتمعنا وأصبحت آفة لدرجه انه أصبح من النادر أن تجدي من يسمع وينصت قبل أن يتحدث
شرفتيني و أشكرك
**************
شادي
راسبوتين من الشخصيات اللي اتكتب فيها كتير جدا واتعمل فيها أفلام سينيمائية وأغاني كمان، للأسف مقرأتش الرواية اللي بتقول عليها لأحمد توفيق وأتمني اني اعرف اقرأها قريب انشالله
أشكرك وسعيد بتشريفك ليا

قاسم أفندي said...

وليد عليوة
باتفق معاك تماما في كل اللي قلته فعلا في الجزئين اللي تناولتهم في كلامك، فحقيقة استغلال الدين موجودة ودايما أقول ان اكبر دليل واضح علي كده هو تاريخ انشاء الدولة السعودية، لو تقرأ التاريخ هتلاقي أبشع صور استغلال الدين في المصالح الدنيوية، بالرغم من اني مش أنصار فصل الدين عن الدولة في المطلق لكني باشوف ان في معظم الأحوال بيتم استغلال الدين بصورة مهينة خاصة في السياسة لتصفية المعارضين والمبدأ موجود وتم تطبيقه علي كل الأديان تقريبا، فانشاء دولة اسرائيل قام علي اساس استغلال الدين، ومحاكم التفتيش في الأندلس أيضا قامت علي استغلال الدين.. موضوع كبير وياخد مجلدات بحث، لكن ده لا يعني أن فصل الدين عن الدولة هو النموذج الأمثل. ولكنه قد يكون كذلك في ظل الجهل الديني ومشايخ الحكومة
بالنسبة للموضوع الثاني فأوافقك الرأي أيضا وكم من أمثلة مرت علينا ينطبق عليها هذا بالحرف الواحد
حتى أنني أذكر أنك نفسك قد قلت عني مؤخرا : أيمن الذ كتير علي الانترنت من الواقع
:)
بس أضيف علي كده برضه أن المستقبل علي الطرف الآخر أيضا له دور كبير، بمعني أنني عندما أخاطب شخصا لا أراه فأني أرسم له صورة في مخيلتي تلعب هذه الصورة دورا رئيسيا في العلاقة بين الطرفين
سعيد بتعليقك وفي انتظار اشوف لك مدونة قريب لاني متأكد أنها هتكون ممتعة
تحياتي صديقي العزيز

احمد عزام said...

عمدتنا الكبير
احييك علي تحليلك للروايه .......ولكن الحاج راسبو مش كان واخد باله ان الزمن اتغيير ...وبالتالي لما ظهر كان فاكر ان النسوان هتنخدع بالستار الديني وتعجب باسطوره المتعه الجنسيه اللامحدوده....ولكن يا خساره الزمن اتغير

البتاع said...

بص انا مقريتش البوست
بس انا بموووت فى راسبوتين

استنى عليا لما امتحن يوم الخميس واجى افصفلك البوست ده واضبطك يامعلم

والنبى والنبى ماتكتب حاجة لحد مااجيلك

طحياطى ياموسوعة

kmam said...

يا عم ايمن
الراسبوتينيين اخطر علي الدين من دعاة فصل الدين عن الدوله ، و فكرة الفصل نشأت أساسا لحماية النظام السياسي من عبث اشخاص يلبسون عباءات مقدسه او مبهره ، كالدين او الثقافه او النسب و من خلالها يستبدون بالحكم و يديرون شؤون الدوله لمصالحهم
و بالتالي و عندما يخلع نظام الحكم كل ما هو مقدس ، يصبح نظاما بشريا و بالتالي يصبح قابلا للمساءله و التغيير
علي الطرف الاخر سيتعبر الراسبوتينيين هذا كفرا و اثما لانه سيحرمهم من امتيازات عظيمه ، بدءا من السلطه الي التحكم في خلق الله و الاسافل منهم سيحرمون من تحقيق شهواتهم الدنيئه
اغرب شئ يثيردهشتي هو كيف لا يري الاخرون ما اراه في كل لابسي العباءات الراسبوتينيه؟؟هل نحتاج الي نخلع عنه العباءه لنكتشف انه مخادع؟؟؟

بنوتة من وسط البلد said...

سيدى وتاج راسى ايمن افندى
فين ساندوتشات الفول .. انت مش عارف انى لسه ما قبضتش ؟؟

مش هنسهالك , ع العموم انا منبهرة بموضوعك بس مين راسبوتين ده ؟؟؟ :)

ارى وخصوصا على صفحات الانترنت اننا بينهال علينا وابل من الرسائل الدينية الى للاسف اقل ما يقال عنها انها عبيطة وساذجة وكلها رسائل موجهه طبعا علشان البعدا يشاوروا علينا من بعيد ويقولوا شايفين الهبل الى بيصدقوا

وكلها رسائل من ماركة:
طفلة مريضة رات السيدة زينب فى المنام وبتقولكوا انشروا الرسالة دى على الناس وواحدة تانى بتاعة خادم الحرمين

وانكت واحدة بقى بتقولك, ان طفلة فلسطينية فى ارض المقدس جالها الرسول ص فى المنام وقالها ان راسم الكاريكاتير الدينماركى لقوه محروق جمب مبنى الجريدة وابعتي الرسالة لكل الناس دى على الانترنت :)))))

ده غير الطبيب الى كسب مش عارفة كام الف جنية لما بعت الرسالة والمهندس الى اتحرق لما اهمل الرسالة

الحقيقة انا بقالى ما لايقل عن 8 سنين بمسح الرسايل دى ولا شفت حرق ولا خسارة ولا اى حاجة بعيد عند

ربنا يرحمنا وانا طولت اوى اعذرووونى

A.SAMIR said...

وليه هنفترض يا قاسم افندي ان متصفحي النت دول مجموعة من البسطاء اللي ممكن انهم ينساقوا وراء اي حد؟
انا افهم لو الكلام دة منشور في مجلة ولا جريدة او حتى بيتقال في قناة فضائية
انما هل تتصور ان حد ممكن يضحك على ناس بتدخل ع النت ومشتركة كمان في منتديات ومجموعات بريدية؟
معقووول؟
الناس دي دماغها اكيد توزن بلد وتعرف الصح من الغلط وعارفة كويس قوي مين اللي بيتخفى ورا الدين ومين لأ؟
طبعا انا احترم جدا نبل هدفك من التحذير ولكن دة رأيي مش عارف هتتفق معايا ولا لا؟
تحياتي ليك واسف ع الاطالة

قاسم أفندي said...

احمد بك عزام
مثل هذه الشخصيات تستغل بالأساس الجهل أو علي الأقل عدم الألمام بمباديء الدين، مستغلين الغريزة الأيمانية لهؤلاء ومن ثم نصب شراكهم الخداعة حولهم ، لذا أري أن الاحتياط من هؤلاء يتمثل في المقام الأول بالإطلاع والعلم
تحياتي
**************
البتاع
بتموتي في راسبوتين ايه بس وطي صوتك ليسمعك
يا بنتي راسبوتين ده اللي باحكي عنه راجل شرير بيخطف البنات الصغيرة ويضحك عليهم
المهم بس متتأخريش عليا أحسن أيدي بتاكلني وعايز أنزل بفرانكشتين بقي
:)
أنستنا يا جميل
**********
KMAM
عزيزي خالد
أتفق معك ولكني لازلت أحلم .. ولكن علي ما يبدو أني أحلم بالمدينة الفاضلة .. سبق وأن قلت أن الحكم العلماني في زماننا هذا أفضل ممن يدعون تطبيق الدين ، لأن غالبيتهم مع الأسف يستغلونه فقط لتحقيق أهدافهم
شيء محزن مع الأسف
سعدت بتعليقك الجميل وأشكرك
***********
ست الكل كيداهم كلهم بنوتة بنت عم وسط البلد
يا فندم انا مجهزلك شاندوشت حلاوة بالقشطة كمان مش فول بس انتي تعالي
وبعدين انتي مفيش فايدة يعني مش ربنا كرمك الحمد لله خلاص وتاب عليكي من شاندوشتات عربية الفول وبقيتي تاكلي كشري من عند أبو طارق؟
اللي علي علي بقي ياعم
راسبوتين ده سعادتك راجل كبارة كده مات مقتول من بتاع تسعين سنة كده بس مش عارف ايه فكرني بيه ... أصل بعيد عنك فيه ناس لسه بتقلدوا لحد النهاردة ... عارفة الموضوع مضحك والله زي بالظبط اللي يجي النهاردة ويقلد شارلي شابلن
صباحو موز باللبن يا باشا وطولي براحتك بيتك ومطرحك بس وانتي خارجة الله يكرمك ابقي نزلي باب الدكانة وراكي
شرفتيني يا ست الكل
***********
أحمد سمير
ايه الصورة الحلوة دي يا دوك؟
متاحولش تسرق المعجبات أنا باحذرك اهو
:)
مش عارف انت ليه مفترض ان كل اللي بيدخلوا علي النت لازم يكونوا علي قدر عالي من الثقافة
أنا شايف العكس هو الصحيح هاديلك مثال مثلا أنا بنتي الصغيرة المقروضة اللي عندها ثمان سنين بتدخل علي النت زي القرد وعندها ايميل وبتبعتلي ايميلات كمان
عايز اكتر من كده؟ وعلي فكرة معظم الايميلات اللي بتبعتهالي بتبقي جايلها من صاحباتها
عادي يعني
صباح الفل يا باشا الكمبيوتر والانترنت دلوقتي في أيدي الجميع
شرفتني ونورتني وأشكرك

البتاع said...

انا جيت اهه
ازايك قاسم باشا؟

انا قريت البوست وهو بوست حلو جدا
انا قريت كتاب عن راسبوتين ل على الجوهرى
متفق معاك فى موضوع مقرب للقصر والهدنة وكده
وان كان لا ينفى انه راهب داعر
يرتدى عباءة الدين لخدمة مصالحه
لكن موضوع سحره وشفاءه لابن ملكة روسيا بالسحر ده طبعا كله كلام فارغ


اما عن حبى له
فكنت بتكلم فيها مع صحفى صديق ليا
ربنا يوقفه يارب
واتخض لما عرف
بس انا ليا نظرية
انا احترم كل من له هدف يخطط له ويوصله
زى اليهود
انا بكره اسرائيل زى شعبولا
لكن فى نفس الوقت بحترمهم جدا للانهم على نفس مخططهم من مؤتمر بازل فى سويسرا ااااخر القرن ال17 محودوش لحظة
كذلك هو
بغض النظر هو طيب او لا
ثم بيقولو الستات بتحبه
يمكن كان ليا عرق روسى اياميها وحبيته ككل نسوان روسيا
ههههههههههه

اما القصة اللى تكلم عليها صديقنا شادى فايد لد \احمد خالد توفيق
فهى روايه " عينان" وهى رواية عبقرية
وان كانت تناولت الاسطورة كما هى محاولتش تغير فيها

انت عارف؟
من احلى ماغنى فريق بونى ام
اغنية
رارار راسبوتين
الاغنية دى ورد مقاطع منها فى روايه د \ احمد
انا حكتب لك كلماتها كلها ياعم
اى خدمة
وححاول ارفعها وابعتلك اللينك
وان كان ماليش فى مضوع الرفع ده
بس برضه مش من شيمى اليأس
الكلمات اهيه
لحد ما ارفع الاغنية ويارب اعرف

رغيت كتير
انا اسفة
بس بجد شخصية ثرية
ولو فيه وقت كنت اتكلمت عنها ساعات عن كل جوانب حياته
لانى فعلا بحترمه كتير


تحياتى ياباشا

والكلمات اهيه


There lived a certain man in Russia long ago
He was big and strong, in his eyes a flaming glow
Most people looked at him with terror and with fear
But to Moscow chicks he was such a lovely dear
He could preach the bible like a preacher
Full of ecstacy and fire
But he also was the kind of teacher
Women would desire

Hey hey hey hey hey hey hey hey...



Ra Ra Rasputin
Lover of the Russian queen
There was a cat that really was gone
Ra Ra Rasputin
Russia's greatest love machine
It was a shame how he carried on

He ruled the Russian land and never mind the czar
But the kasachok he danced really wunderbar
In all affairs of state he was the man to please
But he was real great when he had a girl to squeeze
For the queen he was no wheeler dealer
Though she'd heard the things he'd done
She believed he was a holy healer
Who would heal her son



But when his drinking and lusting and his hunger
for power became known to more and more people,
the demands to do something about this outrageous
man became louder and louder.

Hey hey hey hey hey hey hey hey
Hey hey hey hey hey hey hey hey

"This man's just got to go!" declared his enemies
But the ladies begged "Don't you try to do it, please"
No doubt this Rasputin had lots of hidden charms
Though he was a brute they just fell into his arms
Then one night some men of higher standing
Set a trap, they're not to blame
"Come to visit us" they kept demanding
And he really came


Ra Ra Rasputin
Lover of the Russian queen
They put some poison into his wine
Ra Ra Rasputin
Russia's greatest love machine
He drank it all and said "I feel fine"

Ra Ra Rasputin
Lover of the Russian queen
They didn't quit, they wanted his head
Ra Ra Rasputin
Russia's greatest love machine
And so they shot him till he was dead

(Spoken:) Oh, those Russians...

البتاع said...

هييييييييه
رفعتها
ادى الاغنية

ده التوزيع اللى كان فى شريطهم الجديد 2003
ريمكس
وحبعتلك برضه التوزيع القديم


ايه الكرم اللى انا فيه ده؟؟
ااااه
بس لازم فى المقابل تدعيلى انجح
ماشى؟؟

اهه

توزيع الجديد

http://www.4shared.com/file/16610257/f52ec8f4/Boney_M_-_Rasputin__Remix_2000_.html?

Abd El Rahman said...

نسبياً موافق ان الدين أفيون الشعوب في حالة استغلاله الخاطيء وموافق انه أخطر سلاح يمكن استخدامه لتجديد نهوض الأمم أو لهدمها، المشكلة ان القوة البشرية محتاجة ضابط حقيقي لسيرها فاما يكون الدين وخصوصاً الاسلام بفهمه المعتدل وسعة ساحته للاجتهاد البشري دافع حقيقي واما يكون أفيون ومسكن طويل المدى يتعاطاه البشر بطريقة التعلق بالنصوص وإيكال المستحدثات إليها بميزان واحد لا يقبل تعددية الفهم والاجتهاد واما يتعاطوه بالفصل المطلق بينه وبين الحياة والحالتين خطأ وخطر في رأيي

الإسلام له خصوصية ختم الرسالات التي لا تنفصل في رأيي عن اتساع مساحة الاجتهاد البشري كلما تغير الزمان والمكان ، الأهم أنه ليس ديناً كهنوتياً وحتى ما نظنه مواطن ضعف في تاريخنا الاسلامي انا اعتبر بعضها دليل قوة حتى ان وصلت للقتل وخروج بعض الصحابة على بعضهم

الخلاصة : الدين الذي يحافظ على حرية الإنسان ويحميها لا يمكن أبداً ان يكون حكراً لفهم جماعة او فئة يتوهمون أنه لا يفهم الا كما فهموه

يا مراكبي said...

عجبني جدا الموضوع وعجبني كمان الوعي اللي موجود في التعليقات هنا

أنا شخصيا جاءتني نصيحة بإني إذا كنت عايز أجمع عدد أكبر من الناس حواليا فما عليا غير التحدث بالدين .. أو التظاهر بذلك

فالكل بيعرف إن العوام من الناس وحتى بعض المثقفين ممكن جدا يقتنعوا بالمظاهر الدينية .. والأمثلة في برامجنا الدينية كتيرة جدا

يعني الناس اللي موجودين دلوقت هيكونوا أعلم وأثبت من اللي هيفتنوا بالمسيخ الدجال عند ظهوره وهيكون بيعمل معجزات وبيدعي الألوهية؟ إنه الجهل ياعزيزي

زحل الفلكي said...

بوست في الجون يا هندسه
واضم صوتي لصوتك
مش اي فتوى نسمعها ننشرها
ومش اي ايميل يتبعتلك تنقله

لازم نتحري الدقة اكثر في الكلام اللي بننقله

يعني مثلا يجيلك ايميل فيه صورة المسجد الحرام وملعوب فيها فوتوشوب
طبعاً حاجه تغيظ

تلاقي تعليق عبقري تحت الصورة يقولك اللي عملها ايده اتشلت بعد 3 ثواني من لما خلصها

مش عارف يعني حتى لو صح انا مش مصدق
ايميل تاني تلاقي فيه صورة يقولك ده قبر قابيل

قبر قابيل
ياااااااااااه
ده من زماااان اوي بقا على كده
وهو مش بعد قابيل بكتير جاء سيدنا نوح وجاء الطوفان اللي غرق الارض كلها
طب ازاي ده قبر قابيل
وخد عندك من ده كتير

فلازم الواحد يتحري الدقة
اضم صوتي لصوتك بشده في هذا الموضوع

واسف علشان مقصر في الزيارات بس الامتحانات بقا
دعواتك

قاسم أفندي said...

البتاع
ماشاء الله عليكي دانتي طلعتي بتاع كبير اوي ومكنتش واخد بالي، وبتقولي عليا انا اللي موسوعة؟؟ وكمان وصلتي لبوني ام، طبعا يمكن تسألي اللي من سني كانوا عايشين ازاي مع البوني أم ... ياه فكرتونا بالذي مضى والله، اغنية جميلة بالفعل وكانت زمان عندي طبعا وكمان حمدية حمدي كانت هاريانا بيها في العالم يغني الساعة تسعة ونص علي ما افتكر علي القناة التانية
عموما مستشكرين ويجعله عامر .. الا من حق بتعملي موضوع الابلود ده ازاي بقي؟
تحياتي
************
عبد الرحمن
باتفق معاك في الرأي تماما .. مش سبق وقولتلك عقلك أكبر من سنك بعشر سنين؟ .. تحياتي وأشكرك
***********
يا مراكبي
أولا باشكر ليك زيارتك ومجاملتك الرقيقة جدا واتمنى دوام التواصل في الخير انشالله
عارف، كلامك فكرني بحلقة اليوم السابع الاخيرة علي الام بي سي بتاعت محمود سعد لما كلم الاعلامي جمال الشاعر علي التلفون ع الهوا وحكاله عن الدكتور صاحب فتوى الرضاعة ان فضيلة الدكتور المحترم بعد الحلقة قال لجمال الشاعر الموضوع ده هيعمل فرقعة محصلتش ... تصور؟؟
هو واضح الموضوع بقي فيه كتير جدا من التجارة .. ربنا يسترها علينا يارب

البتاع said...

ياباشا اى خدمة
مايجيش من بعدك طبعا

ههههههههه
بس لو كتبت عن فرانكستاين برضه حتكلم
هههههههههه
للاسف مفيش وش بيطلع لسانه
..........
بالنوسبة لرفع الاغانى
موقع فورشير ده بتدخل تعمل عليه ريجستر
وترفع الاغانى بتاعتك وهو حيديك اللينك اللى عليه الاغنية
وترفع اغانى بحد اقصى 100 ميجا

وجرب ولو وقف قصادك اى حاجة قولى بس

اما بونى ام بقى
فأنا الفترة دى ماليش فيها اوى الصراحة
انا بسمع دايما اغانى الخمسينات
دين مارتن وفرانك سيناترا والجيل ده كله
لكن السبعينات ماليش فيه اوى فى الاجنبى

لكن فى العربى فريق الفور ام عندى شرايطه كلها
وفريق المصريين والاصدقاء
هههههههههههههه
اى اغنية أأمر بس وانا ارفعهالك

ياقاسم باشا
انعمنا عليك بالبشاوية

تحياتىى

شخبطة ملوكى said...

للاسف الخلط بين راسبوتين رجل الدين كما يدعى و بشرعاديون ممن يدعون الالتزام خطأ كبير يقع فيه الكثيرون
ان تاخذ العلم من رجل دين وان تنخدع فيه امر بالغ الخطورة اما من هم ينتمون للعامة و يظهرون التدين قد يكونوا صادقين و يخطئون وهذا طبيعى فهم بشر و ليس علينا ان نعود ادراجنا متحججين بان من ارشدنا او قادنا فاسق او خاطئ ، فنحن لا نعرف الحق بالجال و لكننا نعلم الرجال بالحق
تحياتى

Tamer Nabil said...

معلومات مهمة اول مرة اسمع عنها


الف شكرا قاسم باشا


تحياتى

قاسم أفندي said...

زحل الفلكي
اشكرك لزيارتك ووقتك وربنا يوفقك يارب في امتحاناتك
من فترة كانت انتشرت صور لمبنى مكعب مغطي بقماش اسود واتعملت حملة هوجاء للدفاع عن الكعبة بحجة ان المبني ده عملوه الناس الكفار حانة علي شبه الكعبة عشان يسخروا من المسلمون
اول ما جالي الايميل ده عملت بحث علي الانترنت وبمنتهي السهولة اكتشفت ان المبني ده هو مقر مبيعات او معرض لشركة آبل وكان مغطي بالقماش قبل الافتتاح وهو مصنوع من الزجاج الشفاف وكان مغطي عشان المفاجأة يوم الافتتاح وبصراحة المبني في منتهي الجمال والشياكة والموضوع طلع كله فشنك وناس كانت عمالة تهطل ع الفاضي ويضحكوا الناس علينا
للاسف فعلا استغلال الدين بجهل بيضر جدا
أشكرك
**************
البتاع
والله يا معالي البتاع منا عارف اودي جمايل سيادتك فين
وطالما وصلتي لدين مارتن مش هاقدر اقولك بم
الا مين دين مارتن ده بالمناسبة؟
:))))))))))
يجعله عامر ومتشكرين ع الباشوية
***********
شخبطة ملوكي
الحقيقة يا طارق انا لما كتبت الموضوع كان قصدي واضح وصريح وهو استغلال الدين لاغراض شخصية أو المتاجرة بالدين عموما
والحقيقة الموضوع اتشعب كتير من خلال تعليقات الأخوة والاخوات الافاضل مما أثرى الحوار كما أري
الخلط بين رجال الدين ممن يستغلوا صفتهم وبين الناس العاديين الذين يرتدون عباءة الدين وارد أيضا فكلاهما غرضه غير شريف، استغلال الدين يا عزيزي ليس له مبرر
الخطأ وارد ولكن ما أقصده هنا هو وجود النية المبيتة وقد ضربت مثلا لذلك ببعض شركات توظيف الأموال، وأذكر هنا أيضا أحمد الفيشاوي أيضا وغيرهم كثير ... هذه الأقنعة سرعان ما تسقط ويظهر الوجه القبيح..
وعموما ديننا كما تعلم ليس به ما يسمي حقيقة برجل دين، فيكفي الانسان البسيط أن يأخذ دينه من شخص عادي لمجرد انه يراه ملتحي قصير الجلباب يصلي فروضه في المسجد .. مش صح برضه؟
أعتقد أن العيب فينا أحنا اللي بنلغي تفكيرنا بسبب المظهر
تحياتي صديقي العزيز

شخبطة ملوكى said...

اللى انت شايفه من ان النماذج دى ممكن يكون استبدالها بحكم مبنى على فصل الدين هو الخطا الاكبر
لان انت بده بتحكم على الدين من خلال نماذج غير معبره بشكل صحيح عن الدين
ولو اننا بنينا احكامنا على ماضى او اخطاء اناس يقولون كلمة الحق فرفضناها لمجرد سقطاتهم نكون نحن ايضا بعيدين عن الحق
الخطأ كل الخطأ ان نخلط بين رجل دين فاسد يعيث فى الارض فسادا و يقول القول الحق يراد به باطل و بين اناس بيننا عاديون فى طريق الالتزام يقولون و يفعلون و يقولون ولا يستطيعون التنفيذ فلكل شهواته و لكل سقطاته
و العيب كل العيب حينما نكتشف ذلك ان نعود ادراجنا الى طريق الرفض للدين متحججين بنماذج سقطت او اصابها كبوة و ستعود وانا هنا لست فى مجال دفاع عن احد ولا فى مجال ادعاء الحق
فبالحق يعرف الرجال وليس بالرجال يعرف الحق ، الثوابت معروفه و الحق بين و الباطل بين و مهما قال الحق الف ضال يظل الحق حقا و اولى بالاتباع ، و مهما قال الباطل دعاة التدين و الفضيله يظل الباطل باطلا ، و لن نستبدل الحق بالباطل فقط لان من هم على الحق ادعياء او غير شرفاء فالحق ظاهر و لو كره الكارهون ، والله متم نوره كما وعدنا طال الزمان او قصر
اخوانى الاعزاء راسبوتين العصر الحديث لن يجعلنا نحول المسجد بيت دعارة ، ولن يجعلنا نجعل صلاتنا رقص مع الشيطان ، مهما كثر عدد من على شاكلة راسبوتين يجب ان نثبت فى زمن يكون الممسك على دينه كالقابض على الجمر

Mirage said...

استغلال الدين فى تحقيق مصالح شخصية اصبحت خدعة مكشوفة ومهروشة ويستطيع اى انسان يتمتع بمستوى طبيعى من الذكاء ان يكتشفها بسهولة ومادون ذلك فهو احمق ساذج

مثل كل الشعب المصرى المتخلف الجاهل الذى يوءيد الاخوان المسلمين الذين يريدوا تحويل ام الدنيا الى افغانستان

MAKSOFA said...

تعرف لما احب أنضف دماغي اجي مدونتك

أبو أمل said...

قاسم بيه
انت حطيت إيدك على منطقة مهمة نعانى منها
بحق انت تطرح قضايا مهمة وتعالجها بفكر رائع

قاسم أفندي said...

تامر نبيل
أشكرك
كلك ذوق
شرفتني وسعيد بزيارتك
********
طارق مملوك
اتفق معك في ما قلت ولكن هذا لا يمنع الحذر والحيطة وعدم الأخذ بالمظاهر
أشكرك وسعيد بالحوار معك
**********
ميراج
شوف علي الرغم اني مش اخوان لكن الناس دي اكتر ناس اتظلمت في البلد
كفاية اللي هم فيه
معتقدتش ان فيه حاجه اسوأ من اللي احنا فيه دلوقتي
تحياتي
**************
مكسوفة
ربنا يخليكي يارب
شهادة كبيرة اوي اعتز بيها
بجد سعيد بكلامك ده جدا
************
أبو أمل
أشكرك
شرفتني وسعيد بزيارتك ويارب افضل عند حسن ظنكم دايما

Anonymous said...

يعنى حضرتك بتبرأة وفى نفس الوقت بتحذر من أمثاله?!!!! عجيبة صح أخى لا أدخل فى النوايا لأنها من أمر رب العباد أيا كانت ديانتهم ولكن الحلال بين والحرام بين ومعرفة أوامر ربك أمر ملزم لأن الكثير منا يقع فى الكبائر وهو يحسن الظن بنفسه وكلامك عن التكفير فلو من القرأن والسنه يستند فهو رجل صادق ويريد النصيحة لما لا ننظر على أنها نصيحة قبل أن يفوت الأوان لما التحفز لو كلامى خطأ أنا مستعد للنقاش فى أى وقت emadrefaee@yahoo.com

gamal said...

بسم الله الذى لا يحمد على مكروه سواه



عجيب ان ياتى الزمن الذى يصبح فيه العرب و المسلمون ياخذون المثل الاعلى و الاقوال المأثورة من جماعة من الكفرة مثل الشيوعيون


" الدين افيون الشعوب "

و انتم معه توافقون


و الله هذا يذكرن بحديث للسول الكريم صلى الله عليه و سلم

" سيجىء يوم يكون فيه القايض على دينه كالقابض على جمر من النار "


و الله انى ارى ان ذلك اليوم قد جاء


و لو هناخد كل اللى يجى من الغرب على انه مسلم به

اذا لا مانع لدينا من تصديق نظريات العالم فرويد

الذى يرجع كل تصرفات الانسا الى الشهوة و الجنس حتى ارضاع الام لولدها


............


و الاخ الذى عقب بان الناس فاهمة ان المتدين هو اللى بيصلى و ما بيشربش سجاير "

و الله يا اخى الناس لها الظاهر

و احب بجد اعرف ايه تعريفه للمتدين

ولا مثلا يكون زى تدين الممثلات الى بتقولك انا متدينه ، و تلاقيها صالعة فى الفلم او المسلسل او الحفلة

لابسة نص هدوم

و لا مثلا زى ايمان الاستاذ الشاعر الكبير احمد فؤاد نجم اللى بيقول انه ما بيصليش لكن فى بينه و بين ربنا عمار


" الصلاة عماد الدين ، من هدمها هدم الدين "


ولا ايه

و لو انا غلطان احب حد يصححلى